سۋرەتشى- يلليۋستراتور كەرري نيۋمايەر ونەرگە باۋلۋدىڭ امەريكاندىق ۇلگىسىن كورسەتتى

استانا. قازاقپارات - سۋرەتشى-يلليۋستراتور كەرري نيۋمايەر - امەريكانىڭ كەنتۋككي شتاتىنا كەڭىنەن تانىمال جان-جاقتى ونەر يەسى.

تاياۋدا ول الماتى مەن استانا قالالارىندا بولىپ، قازاقستاندىق بالالارعا ارناپ شەبەرلىك سىنىپتارىن وتكىزدى.

ولاردى اينالاداعى سۇلۋلىق پەن كوركەمدىكتى كورە بىلۋگە، سونى قاعازعا تۇسىرۋگە باۋلىدى.

كەرري حالىقتىڭ ءارتۇرلى توپتارىنا ارنالعان ونەر سالاسىنداعى اعارتۋشىلىق جوبالاردى جۇرگىزەدى. 2002-جىلى سينتسينناتيدەگى سۋرەت اكادەمياسىن ءتامامداپ، باكالاۆر دارەجەسىن يەمدەنگەن. سوسىن لۋيسۆيلل ۋنيۆەرسيتەتىنەن ونەر ماگيسترى دارەجەسىن الىپ شىقتى. 8 جىلدان بەرى مەملەكەتتىك مەكتەپتەردە ساباق بەرىپ كەلەدى. ونىڭ وقۋشىلارى كوپتەگەن ونەر بايگەلەرىندە وق بويى وزىق شىعىپ، ۇزدىك اتانعان.

بۇگىندە ول لۋيسۆيلل ۋنيۆەرسيتەتىنە قاراستى ءبىلىم جانە ادامدىق دامۋ كوللەدجىندە ۇستازدىق ەتەدى. ودان وزگە كەنتۋككي شتاتىنداعى مەكتەپتەردە ءدارىس بەرەدى. جاستار اراسىندا كوشباسشىلىق، ساۋاتتىلىق، ەركىن وي مەن تاريح تاقىرىبىندا ءتۇرلى قوعامدىق جوبالاردى جۇزەگە اسىرعان بەلسەندى تۇلعا. جۋرنالدارعا يلليۋستراتسيا جاسايتىن، روك- مۋزىكا جازاتىن جانە ورىندايتىن ونەرى دە بار. ول ءۇش كۇندىك لۋيسۆيلل مۋزىكا فەستيۆالىنىڭ قوسالقى اۆتورى. وعان بۇكىل امەريكا شتاتتارىنان ءانشى قىزدار كەلىپ قاتىسادى. 10-18 جاس ارالىعىنداعى قىزدارعا مۋزىكادان سەمينارلار وتكىزىپ، اسپاپتا ويناۋدى ۇيرەتەدى.

قازاقستاندا دا كەرري ونەر قۇدىرەتىن بالالاردىڭ جۇرەگىنە جەتكىزۋ ماقساتىندا بىرنەشە ءىس-شارالار وتكىزدى. اۋەلى الماتىدا 10 كۇن بويى ARTBATFEST-6 فەستيۆالىنە قاتىستى. بۇل شارا ا ق ش- تىڭ قازاقستانداعى ەلشىلىك ميسسياسىنىڭ قولداۋىمەن ىسكە اسىرىلدى. سونداي-اق، ءابىلحان قاستەيەۆ اتىنداعى ونەر مەكتەبىنىڭ وقۋشىلارىمەن بىرگە «ەر توستىك» ەرتەگىسىنىڭ جەلىسىمەن پاننو جاساپ شىقتى.

كەرري استانادا دا قاراپ جاتپادى. بىلەكتى ءتۇرىپ تاستاپ «زامانداس» اۋلا كلۋبىنىڭ بالالارىنا پلەنكادان سكۋلپتۋرالىق تۋىندىلار جاساۋ جونىندە شەبەرلىك سىنىپتارىن وتكىزدى. وعان كلۋب بالالارى ءدان ريزا بولدى. كەي اتا-انالاردىڭ بالالارىن ونەر مەكتەبىندە وقىتۋعا مۇمكىندىگى جوق. ونداي بالالار ءۇيىنىڭ ماڭىنداعى اۋلا كلۋبتارىندا ونەرىن شىڭداۋعا، دامىتۋعا تىرىسادى. سوندىقتان بۇل «زامانداس» كلۋبىنىڭ جەتكىنشەكتەرى ءۇشىن ۇلكەن مۇمكىندىك ەدى.

سۋرەتشىنىڭ بالالارمەن بىرلەسە جاساعان تۋىندىلارى 4- قىركۇيەك كۇنى ەلورداداعى نۇرجول بۋلۆارىندا كورەرمەن نازارىنا ۇسىنىلدى. «Art bombing» دەپ اتالعان بۇل كورمەنىڭ ماقساتى - استانالىقتار نازارىن بالالار شىعارماشىلىعىنا اۋدارۋ جانە قالانىڭ كرەاتيۆتى ءيميدجىن جاساۋ ەدى. فلەش- موب ءوز ماقساتىنا جەتتى دەۋگە ابدەن بولادى. ويتكەنى، ەرەكشە ءىس-شارانى تاماشالاۋشىلار قاراسى كوپ بولدى جانە ولار ونەر تۋىندىلارىن جوعارى باعالادى، جۇمىس اۆتورلارىمەن اڭگىمە-دۇكەن قۇرۋعا قىزىعۋشىلىق تانىتتى. كەرري سونداي-اق وسى كلۋب بالالارىنىڭ باسىن قوسىپ، جاڭا امەريكالىق بۇرىشقا فرەسكا جاساپ شىقتى.

«SOS بالالار اۋىلىنىڭ» تاربيەلەنۋشىلەرىمەن وتكەن شىعارماشىلىق كەزدەسۋ دە ءوز دەڭگەيىندە، وتە قىزىقتى ءوتتى. سۋرەتشى-پەداگوگ قالا ماڭىنداعى مەكتەپ وقۋشىلارىنىڭ تىنىس-تىرشىلىگىمەن تانىسۋدى دا ۇمىتپادى.

ءبىزدىڭ تالانتتى بالالار كەرري نيۋمايەردىڭ بالا جانىنا ىزگىلىك ءدانىن ەگىپ، ونەرمەن سۋسىنداتۋدى ومىرلىك ماقسات ەتكەن پەداگوگ، ونەرتانۋشى ەكەندىگىنە كوز جەتكىزدى. ول قازاقستاندىقتار اراسىندا دا ونەرگە دەگەن قىزىعۋشىلىق پەن ماحابباتتى وياتىپ، ءوز ماقساتىنا جەتتى دەگەن ويدامىز. امەريكالىق قوناق اسىرەسە بالالارىمىزدىڭ سۋرەت سالۋعا دەگەن قۇشتارلىعىن ەرەكشە باعالادى.

«ءار بالا تالانتتى. ءار بالانىڭ قيالى مەن ءومىردى كورۋدە وزىندىك كوزقاراسى بار. مەن سۋرەت سالۋ قولىنان كەلمەيتىن بالا جوق دەپ ويلايمىن. ول قابىلەت بارلىعىمىزدا بار. تەك سونى كورە ءبىلۋ كەرەك. بالاعا جاستايىنان ونىڭ قابىلەتى بار ەكەنىن، ءبارى قولىنان كەلەتىنىن ساناسىنا ءسىڭىرىپ ءوسىرۋ كەرەك. مەن قازاق بالالارىنىڭ ءار نارسەنى بىلۋگە قۇشتار ىزدەنىمپاز ءارى وتە سابىرلى ەكەندىگىن بايقادىم. ومىرىمدە ءبىرىنشى رەت اعىلشىنشا بىلمەيتىن شاكىرتتەرمەن جۇمىس ىستەدىم. ءبىراق ونەردىڭ ءوز ءتىلى بار، سوندىقتان ءتىل تابىسۋ قيىن بولعان جوق» دەيدى كەرري نيۋمايەر.

جانات قاپالبايەۆا