استاناداعى «كينوپاركتە» قىز بالانى سوققىعا جىققان ازاماتتىڭ ءىسى پروكۋراتۋرانىڭ قاداعالاۋىندا - ج. اسانوۆ
بۇگىن ءماجىلىستىڭ جالپى وتىرىسى اراسىندا جۋرناليستەرگە بەرگەن سۇحباتىندا باس پروكۋرور ورىنباسارى جاقىپ اسانوۆ استاناداعى «كينوپارك» كينوتەاتر جەلىسىنىڭ بىرىندە ورىن العان وقيعاعا قاتىستى تۇسىنىك بەردى.
«استاناداعى «كينوپارك» كينوتەاترىنىڭ اۋماعىندا قىز بالانى سوققىعا جىققان فاكتى تۋرالى سوتقا دەيىنگى تەرگەۋ شارالارى اتقارىلۋدا. مەنىڭ بىلۋىمشە، بۇل ماتەريال سوتقا دەيىنگى تەرگەۋلەردىڭ ءبىرىڭعاي رەەسترىنە تىركەلگەن. سوندىقتان دا، بۇل ءىس باسقا دا قىلمىستىق ىستەر سەكىلدى باس پروكۋراتۋرانىڭ ەرەكشە قاداعالاۋىندا بولادى. جالپى كەز كەلگەن قىلمىستىق ءىس پروكۋرورلاردىڭ نازارىنان تىس قالمايدى»، - دەپ ءتۇسىندىردى جاقىپ اسانوۆ.
ەسكە سالا كەتەيىك، جاقىندا الەۋمەتتىك جەلىدە جۇرتتى ءدۇر سىلكىندىرگەن ۆيدەو پايدا بولعان ەدى. وندا استاناداعى «كينوپارك» كينوتەاترىنا كەلۋشىلەردىڭ ءبىرى كاسسير قىزبەن سوزگە كەلىپ، كەيىننەن قىزدى ىشىنەن تەۋىپ، سوققىعا جىعادى. مەكەمەنىڭ رەسمي پاراقشاسىندا حابارلانعانىنداي، وقيعاعا قاتىستى ارىز استانا قالالىق ەسىل اۋدانىنىڭ ءى ءى ب- نا جىبەرىلگەن. بۇل وقيعا قوعامدا ۇلكەن رەزونانس تۋدىرۋدا.
اۆتور: قانات مامەتقازى ۇلى
