دۇنيەجۇزىلىك قازاقستاندىقتار قاۋىمداستىعىن قۇرۋ يدەياسى ورتاعا سالىندى

استانا. قازاقپارات - دۇنيەجۇزىلىك قازاقستاندىقتار قاۋىمداستىعىن قۇرۋ يدەياسى قازاقستان ەلشىلىگىنىڭ قولداۋىمەن وتكەن باسقوسۋدا ايتىلدى.

شارا دۇنيەجۇزىلىك قازاقتار قاۋىمداستىعى دەلەگاتسياسىنىڭ كەلۋىنە ورايلاستىرىلعان. جيىنعا بەلارۋستەگى قازاق دياسپوراسىنىڭ وكىلدەرى دە قاتىستى. دەلەگاتسيانى باستاپ كەلگەن تالعات ماماشەۆ جۋرناليستەرگە بەرگەن سۇحباتىندا ەلباسى نۇرسۇلتان نازاربايەۆتىڭ باستاماسىمەن قولعا الىنعان «نۇرلى جول» جاڭا ەكونوميكالىق ساياساتى -  تاريحي وتانىمىزدىڭ الەمدىك داعدارىس پەن زامان تۋدىرعان قاۋىپكە بەرگەن جاۋابى دەدى. جيىندا قازاقستاننان كەلگەن مەيماندارمەن قاتار بەلارۋستەگى دياسپورا وكىلدەرى دە «نۇرلى جول» باعدارلاماسىنا وراي ويلارىمەن ءبولىستى. اڭگىمە بارىسىندا تاريحي وتانىن اڭساپ، ەلىمىزدىڭ دامىپ، وركەندەۋىنە ۇلەس قوسقىسى كەلەتىندەردىڭ باسىن بىرىكتىرەتىن قاۋىمداستىق قۇرۋ يدەياسى ورتاعا سالىندى.

تالعات ماماشەۆ، دۇنيەجۇزىلىك قازاقتار قاۋىمداستىعى ءتوراعاسىنىڭ ءبىرىنشى ورىنباسارى:

- وسىنداي ويىمىز بار. كەزىندە ەلىمىزدە تۇرعان كوپ قازاقستاندىق تاعدىردىڭ جازعانىمەن كوشىپ كەتكەنى راس. ماسەلەن، 800000 قازاقستاندىق نەمىس، تىڭ جەردى يگەرگەن بىرنەشە ءجۇز مىڭ ۋكراينالىق پەن بەلورۋستار، ولاردىڭ بارلىعى ءوزىنىڭ ەكىنشى ءۇيى سانايتىن قازاقستاندى قاتتى ساعىنادى. وسىنداي ەلىمىزدى سۇيەتىن پاتريوتتاردى بىرىكتىرىپ، قازاقستاندىقتار قاۋىمداستىعىن قۇرۋىمىز قاجەت.

www.24.kz