قازاقتىڭ ۇلتتىق رۋحىن اساقاقتاتقان كۇن بولدى - ا. بوجانوۆا
سالتاناتتا مەملەكەت باسشىسى نۇرسۇلتان نازاربايەۆ ابىلاي حاننىڭ ارماندارى ەلىمىز تاۋەلسىزدىگىن العاننان كەيىن ورىندالعانىن ايتتى، دەيدى قىزىلوردا وبلىسىنىڭ قۇرمەتتى ازاماتى الماگۇل بوجانوۆا.
«ەلباسى بۇرىن دا: «قازاق تاريحىندا ءبىز ۇيالاتىن ەشتەڭە جوق» دەپ ايتقان بولاتىن. بۇگىنگى جيىندا سونىڭ جالعاسى رەتىندە بىزگە بابالار تۇلپارىنىڭ تۇياعىمەن جازىلعان اتا تاريحىنىڭ ءار پاراعى ەرەكشە قىمبات ەكەنىن نىقتادى. تاۋەلسىزدىكتىڭ ارقاسىندا اتا- بابالارىمىز قالدىرعان ۇلاڭعايىر جەردىڭ حالىقارالىق قۇجاتتارعا ساي راسىمدەلگەنىنە، اتامەكەننىڭ حالقىمىزعا قاسىرەت اكەلگەن قىرۋ جويۋ قارۋىنان ازات ەتىلگەنىنە توقتالدى.
قازاق حاندىعىنىڭ 550 جىلدىعى ەڭ الدىمەن جاس ۇرپاق بويىنا جەڭىمپاز بابالار رۋحىن ءسىڭىرۋ ءۇشىن كەرەك دەپ ويلايمىن. تاريحىنان تاعىلىم الماعان ۇرپاق، بولاشاعىن باعامداي المايدى. ۇلت تاريحىنىڭ بيىك رۋحقا، ەرەن ەرلىككە، وشپەس ونەگەگە تولى بەتتەرىن ەستە ۇستاۋ كەشەدەن بۇگىنگە امانات بولعان مۇرالاردى كەلەشەكتىڭ ەنشىسىنە بەرۋدىڭ ماڭىزى زور.
استاناداعى ەلدىك تويى ءالى دە جالعاسىپ جاتىر. حالىق بۇل ۇلتتىڭ رۋحىن كوتەرگەن يگى شارا بولعانىن وسى باستان اق ايتىپ جاتىر»، - دەيدى ا. بوجانوۆا.
اۆتور: ەلۋباي اۋەزوۆ
