ورتا ازيا اسپانىن ءبىر قارا بۇلت تورلاي باستادى
ءتىپتى ورەسكەل ارەكەتتەرگە، قاندى قاقتىعىستار ۇيرەنشىكتى جاعدايعا اينالدى. بۇل جاقسىلىقتىڭ نىشانى بولماسا كەرەكتى. كەشە عانا تاجىكستاندا بولعان قارۋلى قاقتىعىس وسىنىڭ ءبىر كورىنىسى. تاجىك پرەزيدەنتى ەمومالي راحموننىڭ بۇيرىعىمەن ورنىنان الىنعان قورعانىس ءمينيسترىنىڭ ورىنباسارى، گەنەرال- مايور ءابدۋلحاليم نازارزودا قارۋلى جاساعىن الىپ تاۋعا شىعىپ كەتتى. جاي كەتكەن جوق، ۆاحدات شاھارىنداعى ءى ءى د بولىمىنە شابۋىل جاسادى. بۇل قاقتىعىستا كۇشتىك قۇرىلىم جاعىنان 30 دان استام جاۋىنگەر قازا تاپسا (رەسمي دۋشانبە 9 ميليتسيونەر دەپ كورسەتەدى) . نازارزودى توبىنان 13 ادام وققا ۇشقان كورىنەدى.
جالپى، گەنەرال ءابدۋلحاليمنىڭ توبىنداعىلار جاي ادام ەمەس، ەلدەگى شابۋىلداۋشى- دەسانتتىق روتانىڭ 136 جاۋىنگەرى بار. بۇلاردىڭ ءبارى جاقسى اسكەري دايىندىقتان وتكەندەر. سونداي- اق ولار وزدەرىمەن بىرگە ەكى كاماز- عا تيەلگەن قارۋ- جاراقتى الا كەتسە كەرەك. قازىر بۇلىكشىل گەنەرالدىڭ توبى دۋشانبەدەن 45 شاقىرىم جەردەگى تاۋلى روميت شاتقالىنا بارىپ جاسىرىنعان.
ءبىر بەلگىلى جايت، ءابدۋلحاليم نازارزودا تاجىكستان يسلام قايتا ورلەۋ پارتياسىنىڭ بەلدى مۇشەسى. ەلدى قانعا بوكتىرگەن 90-جىلدارداعى ازامات سوعىسىندا حاجى حاليم دەگەن اتتى جامىلعان دالا كومانديرى بولعان. تەك 1997 -جىلى بىرىككەن تاجىك وپپوزيتسياسىمەن بيلىك اراسىندا بولعان بەيبىت كەلىسسوزدە وپپوزيتسياعا بەرىلگەن 30 پايىزدىق كۆوتانىڭ ارقاسىندا كۇشتىك قۇرىلىمعا قىزمەتكە كىرگەن ەدى. ال 2014 - جىلى قورعانىس ءمينيسترىنىڭ ورىنباسارى بولىپ تاعايىندالعان. ەندىگى تاعدىرى مىنە! دەگەنمەن، گەنەرال ۆاحدات پەن دۋشانبەنىڭ شەت جاعىندا بولعان قارۋلى قاقتىعىسقا ەش قاتىسى جوق ەكەنىن مالىمدەپ ۇلگەردى. سونداي- اق ۆاحدات قالاسىنا كەلگەن پرەزيدەنت ەمومالي راحمون دا كۇشتىك قۇرىلىمدارعا شابۋىل جاساعان «يسلام مەملەكەتى» تەررورلىق توپتىڭ ادامدارى دەگەندى جاريا ەتتى.
پرەزيدەنتتىڭ ايتۋىنشا، ول توپتىڭ قۇرامىندا ۆاحدات شاھارىنىڭ 46 تۇرعىنى بولعان. مەيلى عوي، تاجىكستاندا توڭكەرىس جاساعىسى كەلگەن گەنەرال ما، الدە «يسلام مەملەكەتى» توبىنىڭ سودىرلارى ما، ايتەۋىر بۇل ەلدە ۇلكەن ءبىر ءدۇمپۋدىڭ نىشانى سەزىلە باستادى. ويتكەنى 2012 -جىلى جازدا تاۋلى باداحشان اۋدانىندا دا وسىنداي قاندى قاقتىعىستار ورىن الىپ، بيلىك 3 مىڭنان استام اسكەر مەن ونداعان تەحنيكا توگە وتىرىپ، قىرعىندى ارەڭ توقتاتقان. ەندىگىسى مىناۋ. ازىرگە تاۋدا جاسىرىنعان توپ اۋىزدىقتالعان جوق. دەمەك، قاقتىعىس ءبىرازعا دەيىن سوزىلۋى مۇمكىن. ەگەر دە ءابدۋلحاليم نازارزودا تاجىكستاننىڭ يسلام قايتا ورلەۋ پارتياسىنىڭ بەلدى مۇشەسى بولسا، وندا ەلدەگى وسى پارتيانىڭ مىڭداعان مۇشەسى كومەككە كەلۋى بەك مۇمكىن. وندا شاعىن قاقتىعىستىڭ ارتى ۇلكەن سوعىسقا الىپ كەلۋى ىقتيمال. سول سەكىلدى قىرعىز ەلىندە دە ۇلكەن ءبىر دۇربەلەڭنىڭ باستالىپ كەتكەنى انىق. ول - پارلامەنت سايلاۋى. ول 4 - قازانعا بەلگىلەنگەن. قازىر سوعان قىزۋ دايىندىق، ۇگىت- ناسيحات ءجۇرىپ جاتىر. سايلاۋعا 14 پارتيا تۇسپەك. دەمەك، تارتىس سولاردىڭ اراسىندا ءوربيدى دەگەن ءسوز. قاي پارتيانىڭ اسىعى الشىسىنان تۇسەدى، ونى 4 - قازان كۇنى كورە جاتارمىز.
بۇل سايلاۋداعى ءبىر تۇيتكىلدى ماسەلە، پارتيالار ۇسىنعان ۇمىتكەرلەر اراسىندا بۇرىن سوتتى بولعان، قىلمىستىق توپتىڭ مۇشەسى بولعان جانداردىڭ وتە كوپتىگى. مۇنى ەلدەگى ءى ءى م- دە جوققا شىعارمادى. قىلمىس الەمىمەن بايلانىسى بارلار پارلامەنتكە ءوتىپ كەتسە، ولار قانشالىقتى حالىقتىڭ سەنىمىن، ءۇمىتىن اقتاماق. بۇل وتە ۇلكەن ماسەلەنىڭ ءبىرى. دەگەنمەن، جەرگىلىكتى ساراپشىلار بۇل ماسەلەنى كەيىنگە ىسىرىپ قويىپ، وزگە تىرلىك جايىندا بولجام جاساۋدا. ولار «بۇل سايلاۋ وتە تارتىستى بولماق. ويتكەنى رەسەيشىل المازبەك اتامبايەۆقا (قازىرگى پرەزيدەنت) ءتىس قايراپ جۇرگەندەر كوپ. ەگەر دە وپپوزيتسيا بىرىگىپ ورتاق كۇشكە اينالاتىن بولسا، اتامبايەۆتىڭ سويىلىن سوعىپ جۇرگەن قازىرگى بيلىك پارتياسى سوتسيال- دەموكراتتار جەڭىلىس تابۋى دا مۇمكىن. ال بيلىك اكىمشىلىك رەسۋرستارىن پايدالاناتىن بولسا، وعان كەلىسپەگەن پارتيالار جاڭا ءبىر توڭكەرىس ۇيىمداستىرارى حاق. ويتكەنى اتامبايەۆتىڭ اسىرەرەسەيشىلدىگى ا ق ش- قا ۇناپ تۇرعان جوق. اق ءۇي وپپوزيتسيانىڭ قولتىعىنا سۋ بۇركۋى مۇمكىن.
قالاي ايتساق تا، وسى پارلامەنت سايلاۋىندا اتامبايەۆتى اياقتان شالاتىندار كوپ» دەسەدى. ءبارى مۇمكىن. سوڭعى كەزدە رەسمي بىشكەك سيريا مەن يراكتا سوعىس جۇرگىزىپ جاتقان «يسلام مەملەكەتى» توبىندا بولعانداردىڭ ەلگە ورالىپ، ەلدىڭ وڭتۇستىگىندە ىرىتكى سالا باستاعانىن ءجيى ايتا باستادى. ولار دا سايلاۋ قورىتىندىسىنىڭ شالاعاي بولعانىن اڭداپ، وپپوزيتسيالىق پارتيالارمەن بىرلەسە بۇلىك كوتەرۋى دە ىقتيمال. قىسقاسى، تاجىكستاندا سوڭعى ءبىر اپتادا بولىپ جاتقان قاندى قاقتىعىس قىرعىز جەرىندە جالعاسىن تاپپاسىنا كىم كەپىل؟
سەيسەن امىربەك ۇلى
«ايقىن»
