قازاق قىزىنا ۇيلەنگەن تۇركيالىق كۇيەۋ بالا ازاماتتىق العان كۇنى قاشىپ كەتتى

 استانا. قازاقپارات - قازاق قىزىمەن نەكەلەسكەن تۇرىك جىگىتى ازاماتتىعى قولىنا تيگەن كۇنى ۇيدەن قاشىپ كەتتى.

وقيعانى كۋاگەر بولعان اعايىننىڭ ءبىرى حابارلادى. وقيعا بيىل كوكتەمدە ورىن العان دەپ حابارلايدى وقيعانىڭ وربۋىنە كۋا بولعان ازامات NUR. KZ- كە.

تۇركيالىق رەجەپ پەن باقىتگۇل وسىدان ءۇش جىل بۇرىن الماتىلىق «باراحولكادا» تانىسقان. جاس وتىز ەكىگە تاقاعان قىز بازاردا ساتۋشى بولىپ جۇمىس جاساپتى. ال كورشى دۇڭگىرشەككە تون اكەلىپ ساتقان رەجەپ بولسا، باقىتگۇلگە كۇنى ءتۇنى سەزىمىن ءبىلدىرىپ، جار بولۋعا كوندىرەدى. ءتىپتى تۇركياعا اپارىپ، قىدىرتقان.

باقىتتان باسى اينالعان قازاق قىزى رەجەپپەن نەكەلەسىپ، وتاۋ قۇرۋعا شەشەدى. ارتىنشا، رەجەپ تۇركيادان تاۋارىن تاسيدى. ال باقىتگۇل ساۋداگەر بولىپ بىرگە جۇمىس جاساعان. ورتاق بالا تۋرالى ءسوز بولعاندا تۇرىك كۇيەۋ بالا «جەكە باسپانا الايىق، اسىقپايىق» دەپ سەندىرىپتى.

كۇندەردىڭ كۇنىندە جۇمىستان ورالعان باقىتگۇل ۇيدەن نە كۇيەۋىن، نە ونىڭ زاتتارىن تابا الماعان. العاشىندا جوعالعان التىندارىن كورىپ، ۇرى ءتۇستى دەپ ويلاعان ول جولداسىن ارامدىققا قيماپتى. تەك ءۇش كۇننەن سوڭ رەجەپ تۇندە قوڭىراۋ شالىپ، اناسى اۋىرىپ جاتقاندىقتان تۇركياعا كەتكەنىن ايتادى. ال قارجى تابا الماعان سوڭ ءوزى سىيعا تارتقان التىنداردى لومباردقا وتكىزىپ كەتتىم دەگەن.

الايدا كۇيەۋ بالا سول كەتكەننەن مول كەتىپ، تەك ءۇش ايدان سوڭ ايەلى سوتتان اجىراسۋ تۋرالى ارىزدى كورگەندە شالقاسىنان تۇسە جازداعان. ارتىنشا سۇراستىرا كەلگەن ول رەجەپتىڭ تۇركيادا ەكى بالاسى مەن كەلىنشەگى بارىن ەستىگەن.

كۇيەۋسىز قالعان كەلىنشەك قازىر سوتقا ارىز ءتۇسىرىپ، ءوزىن پايدالانعان الاياقتان وتەماقى تالاپ ەتىپ، قازاقستان ازاماتتىعىنان ايىرۋدى سۇراماق.

«الاش ايناسى»