باس ءمۇفتي: جاستاردى كىنالاۋدان بۇرىن وزىمىزدەن ەسەپ الۋىمىز كەرەك
«جاستار بارلىق قوعامدا ەڭ ۇلكەن ءرول اتقارۋشى توپ. يسلام دىنىندە دە جاستارعا نىق سەنىم ارتىلادى. جالپى، جاستاردى تاربيەلەۋگە بارلىق قوعام جاۋاپتى. ءبىز ولاردىڭ جۇرەگىنە ەڭ الدىمەن يماندىلىقتى ۇيالاتا ءبىلۋىمىز كەرەك. يماندىلىق دەگەن ول - ار- ۇيات»، - دەگەن باس ءمۇفتي جينالعان مەملەكەتتىك مەكەمەلەردە ەڭبەك ەتەتىن جاستاردى قاراپايىم بولۋعا شاقىردى.
«ادامنىڭ جان دۇنيەسىندە تيتتەي ءبىر اتاققۇمارلىق، مەنمەندىك بولسا ول ءوزىن ورعا جىعاتىن جامان قاسيەت. ەلباسىمىزدىڭ جوعارى وقۋ ورنىن بىتىرگەن جاستاردى «ديپلومەن اۋىلعا» جىبەرۋىنىڭ ءمانى سوندا دەپ ويلايمىن. جاستار تومەنگى جاقتان باستاپ تاجىريبە جيناقتاپ، قاراپايىمدىلىقتى ۇيرەنگەنى دۇرىس»، - دەدى ەرجان قاجى مالعاجى ۇلى.
قوعامنىڭ بەلسەندى بولشەگى بولعان جاستاردىڭ تاربيەسى اقساماۋى كەرەكتىگىن قاداعالاي ايتقان باس ءمۇفتي قازاقستان مۇسىلماندارى ءدىني باسقارماسىنىڭ جانىندا جالپى جانە جاستار ءبولىمىنىڭ جۇمىس جاسايتىندىعىن جەتكىزدى.
«ءبىز جاستاردى ايىپتاۋدان بۇرىن وزىمىزگە قاراۋىمىز كەرەك. قازىر كوپتەگەن بۇقارالىق اقپارات قۇرالدارى بولسىن، ءتىپتى ءمۇيىزى قاراعايداي اعالارىمىز دا جاستاردى كىنالاپ جاتادى. ءبىراق، ءبىز سول جاستارعا جاقسى تاربيە بەرىپ، ۇلتتىق قۇندىلىقتاردى بويىنا سىڭىرە الدىق پا؟ قازىرگى كەزدە مەشىتكە كەلەتىن جاماعاتتىڭ 90 پايىزدان استامى جاستار. ولاردىڭ كەيبىرى وتە تۇيىق بولىپ، قوعاممەن، ءتىپتى، تۋىس- تۋعاندارىمەن ارالاسۋدان قالعان. ءبىز ولاردىڭ اينالاسىمەن قارىم- قاتىناستا بولۋى ءۇشىن باسقارما جانىنان جالپى جانە جاستار دەگەن ءبولىمدى اشىپ، ولارمەن تىعىز قارىم- قاتىناستا جۇمىس جاساۋدامىز»، - دەدى.
