اقتوبە قالاسىنداعى اسكەري بازادا «باتىس» وڭىرلىك قولباسشىلىعىنىڭ ۇزدىك جۇرگىزۋشىلەرى انىقتالدى - فوتو

«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، «ۇزدىك جۇرگىزۋشى»، «ۇزدىك ب ت ر ەكيپاجى» اتالىمدارى بويىنشا وتكىزىلگەن بايقاۋعا اقتوبە، ورال، اتىراۋ جانە اقتاۋ قالالارىنان كوماندالار قاتىستى. جيىنعا «باتىس» وڭىرلىك قولباسشىسىنىڭ ورىنباسارى، پولكوۆنيك يساتاي جاردەموۆ باسشىلىق ەتتى.
«باتىس» وڭىرلىك قولباسشىلىعى تەحنيكا جانە قارۋ- جاراق ءبولىمىنىڭ باستىعى ۆيتالي مۇقاتايەۆتىڭ سوزىنە قاراعاندا، اتالمىش شارا 2006 - جىلدان بەرى ۇيىمداستىرىلىپ كەلەدى. 2013 - جىلى اقتاۋ، وتكەن جىلى اتىراۋ قالاسىندا وتكىزىلسە، بيىل العاش رەت اقتوبەلىكتەر قابىلداپ وتىر. ءۇش كۇنگە سوزىلعان بايقاۋ جەتى كەزەڭنەن تۇردى.
ءبىرىنشى كۇنى قاتىسۋشىلار تەوريالىق بىلىمدەرىن ساراپقا سالسا، ەكىنشى كۇنى كالاشنيكوۆ اۆتوماتى مەن ماكاروۆ تاپانشاسىمەن نىسانا كوزدەدى، جالاۋشالارمەن باسقارۋ دەڭگەيى تەكسەرىلدى. ءۇشىنشى كۇنى قالا سىرتىنداعى اۆتودرومدا جۇرگىزۋشىلەر كەدەرگىلەرمەن ءجۇرىپ وتۋدە بارىنشا كوپ بالل جيناۋعا تىرىستى.
بايقاۋ قورىتىندىسىندا ورال قالاسىنداعى 5517-اسكەري ءبولىم كومانداسى جالپى كوماندالىق ەسەپتە ءبىرىنشى ورىندى ەنشىلەدى. اقتاۋلىق 6656 جانە 3502-اسكەري بولىمدەر كوماندالارى ەكىنشى جانە ءۇشىنشى ورىنداردى ءبولىستى.
قۇرامىندا اعا سەرجانت اسىلبەك تورەعاليەۆ، مەحانيك- جۇرگىزۋشى، ستارشينا مۇحتار ايتبايەۆ، كوزدەۋشى- وپەراتور، قاتارداعى جاۋىنگەر راحمان نۇرلانوۆ بار 5517-اسكەري ءبولىم ەكيپاجى «باتىس» وڭىرلىك قولباسشىلىعىنىڭ «ۇزدىك ب ت ر ەكيپاجى» اتاندى. ال «ۇزدىك جۇرگىزۋشى» اتاعىن وسى بولىمنەن سەرجانت سەرگەي كالەنتيەۆ جەڭىپ الدى.