ا. مىرزاحمەتوۆتىڭ ەلوردالىق زيالى قاۋىممەن كەزدەسۋىندە ەلباسى ۇسىنعان ۇلى دالا ۇعىمىن قالىپتاستىرۋ ماسەلەسى قوزعالدى
كەزدەسۋگە جازۋشى، مەملەكەتتىك سىيلىقتىڭ لاۋرەاتى نەسىپبەك ايت ۇلى، بەلگىلى قالامگەر، «ەگەمەن قازاقستان» ا ق پرەزيدەنتى ساۋىتبەك ابدراحمانوۆ، قازاقستاننىڭ ەڭبەك سىڭىرگەن قايراتكەرى، ءماجىلىس دەپۋتاتى الدان سمايىل،
ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، تاريح عىلىمدارىنىڭ دوكتورى ەرلان سىدىقوۆ، جازۋشى، مەملەكەتتىك سىيلىق يەگەرى قاجىعالي مۇحانبەتقالي ۇلى، جازۋشى، حالىقارالىق «الاش» سىيلىعىنىڭ لاۋرەاتى، قوعام قايراتكەرى مىرزاكەلدى كەمەل، سىنشى، اكادەميك، قازاقستاننىڭ ەڭبەك سىڭىرگەن قايراتكەرى نامازالى وماشيەۆ جانە ت. ب. بەلگىلى تۇلعالار قاتىستى.
«داعدارىستار - وتپەلى، قۇندىلىقتار - ماڭگىلىك» تاقىرىبىمەن وتكەن جيىندا پارتيانىڭ ەلدىڭ مادەني- رۋحاني دامۋىنداعى، قوعامنىڭ بىرلىگى مەن ىنتىماعىن ارتتىرۋداعى قىزمەتى مەن ماقسات- مىندەتتەرى، ەلباسى ۇسىنعان ۇلى دالا ۇعىمىن قالىپتاستىرۋ جانە وسىناۋ جالپىحالىقتىق ىستەگى زيالى قاۋىمنىڭ ءرولى ءسوز بولدى.
ۇلتتىڭ مادەني- رۋحاني وركەندەۋى ەلدىڭ تۇتاس دامۋىندا اسا ماڭىزدى ورىن الاتىنىنا توقتالعان پارتيا ءتوراعاسىنىڭ ءبىرىنشى ورىنباسارى ءوز سوزىندە ەلدەگى جەتەكشى ساياسي كۇش رەتىندە «نۇر وتاننىڭ» اتقارىپ جاتقان جۇمىستارى تۋرالى اڭگىمەلەدى.
«ەلباسى حالىقتىق بەس رەفورمادا بولاشاعى ءبىرتۇتاس ۇلتتى قالىپتاستىرۋدا مەملەكەت قۇراۋشى ۇلت رەتىندە حالقىمىزعا ەرەكشە جاۋاپكەرشىلىك جۇكتەلەتىنىن اتاپ كورسەتتى. وسىناۋ ىستە وزدەرىڭىزدەي ەل جاقسىلارىنىڭ اتقاراتىن ءرولى ەرەكشە. مەملەكەت باسشىسىنىڭ تاۋەلسىزدىكتى نىعايتۋ جولىنداعى باتىل باستامالارىنىڭ جۇزەگە اسۋى ەلدىڭ مادەنيەتى مەن ادەبيەتىنىڭ، ونەرىنىڭ دامۋىنا سۇبەلى ەڭبەك سىڭىرگەن سىزدەردىڭ كوز الدارىڭىزدا. الداعى ۋاقىتتا قوعامدى وسى قول جەتكەن جەتىستىكتى ارى قاراي جالعاۋعا جۇمىلدىرۋ پارىز. بۇگىنگى كەزدەسۋدە باستى ماقسات - وزدەرىڭىزبەن وسى ماسەلە بويىنشا وي ءبولىسۋ»، - دەدى ا. مىرزاحمەتوۆ.
پارتيا ءتوراعاسىنىڭ ءبىرىنشى ورىنباسارى «داعدارىستار - وتپەلى، قۇندىلىقتار - ماڭگىلىك» تاقىرىبىمەن وتكەن كەزدەسۋ بارىسىندا جاھاندىق ەكونوميكالىق قيىندىقتار تۇسىندا ەلىمىزدىڭ سىن- قاتەرلەردەن سۇرىنبەي ءوتۋى ءۇشىن قوعامداعى بىرلىكتىڭ نىعايا ءتۇسۋى بارىنشا ماڭىزدى ەكەنىنە، وسى تۇستا زيالى قاۋىمعا ۇلكەن سەنىم ارتىلاتىنىنا توقتالدى.
سونىمەن قاتار، جيىندا ەلباسىنىڭ قازاقستاندى الەمگە ۇلى دالا ۇرانىمەن تانىتۋ جونىندەگى يدەياسىنىڭ كوكەيكەستىلىگى، وسىناۋ ۇعىمدى ۇلتتىق برەند رەتىندە قالىپتاستىرۋ ماسەلەسى جان- جاقتى ايتىلدى.
بۇگىندە پارتيا 865 مىڭنان استام نۇروتاندىقتىڭ باسىن قوسىپ وتىرعان بولسا، سونىڭ ىشىندە زيالى قاۋىمنىڭ ۇلەسى اۋقىمدى. ەل يگىلىگى جولىنداعى باستامالارعا قوعامدى جۇمىلدىرۋدا پارتيالاستاردىڭ 30,4 پايىزىن، ياعني 263341 ادامدى قۇرايتىن ءبىلىم مەن عىلىم، مادەنيەت سالاسىنىڭ وكىلدەرى - اسا ۇلكەن كۇش. ولار پارتيانىڭ قوعامنىڭ بىرلىگى مەن ىنتىماعىن بەكەمدەۋگە باعىتتالعان كەشەندى دە اۋقىمدى شارالارىنا سۇبەلى ۇلەس قوسىپ كەلەدى.
«نۇر وتان» قوعامدا بىرلىك پەن ىنتىماقتى ساقتاۋ مەن قازاقستاندىق پاتريوتيزمدى قالىپتاستىرۋ بويىنشا جۇيەلى جۇمىس جۇرگىزۋدە. مادەنيەت پەن ونەردى قولداۋ جونىندەگى «ميراس» قوعامدىق كەڭەسى الاڭىندا ءبىلىم مەن مادەنيەتتى ساقتاۋ جانە دامىتۋ، مەملەكەتتىك ءتىلدىڭ اياسىن كەڭەيتۋ سياقتى كوكەيكەستى ماسەلەلەر كەڭىنەن تالقىلانىپ، شەشىمىن تابۋدا.
وتىرىستاردىڭ قورىتىندىسى بويىنشا ق ر پارلامەنتى مەن ۇكىمەتىنە، ءتيىستى مينيسترلىكتەرگە مادەنيەت پەن رۋحانياتتىڭ ءتۇرلى باعىتتارىن دامىتۋدى كوزدەگەن 300 گە جۋىق ناقتى ۇسىنىستار ازىرلەنىپ، جولداندى. بۇل ۇسىنىستار كەڭەستىڭ تۇراقتى قاداعالاۋىندا.
اڭگىمە بارىسىندا وتاندىق مادەنيەتتى دامىتۋ ماسەلەلەرى مەن بۇگىنگى ادەبيەتتىڭ بەتالىسى جايلى ءسوز بولدى. زيالى قاۋىم وكىلدەرى وزدەرىنىڭ شىعارماشىلىق جوسپارلارى جونىندە اڭگىمەلەدى.
كەزدەسۋدىڭ سوڭىندا پارتيا ءتوراعاسىنىڭ ءبىرىنشى ورىنباسارى قوناقتاردى كونستيتۋتسيانىڭ 20 جىلدىق مەرەيتويىمەن قۇتتىقتاپ، شىعارماشىلىق تابىس تىلەدى، دەپ حابارلايدى nurotan.kz.
