مۇحيت دەڭگەيىنىڭ كوتەرىلۋى عالىمداردى شوشىتىپ وتىر

الەمدەگى سۋ قورىنىڭ جىلدام ارتۋىنا كليماتتىڭ تەز وزگەرۋى مەن پوليارلى مۇزداردىڭ ەرۋى سەبەپ. عالىمدار مۇنىڭ سوڭى «قۇرلىق كولەمىنىڭ قىسقارىپ، جاعالاۋعا جاقىن ماڭدا تۇراتىن ادامداردىڭ ومىرىنە قاۋىپ ءتوندىرۋى مۇمكىن» دەپ دابىل قاعۋدا.
NASA جەر شارىن جەرسەرىكتەرى ارقىلى كوپ جىل بويى سۋرەتكە ءتۇسىردى. وسى كادرلاردى مۇقيات زەرتتەگەن عالىمدار الەمدىك مۇحيت دەڭگەيى كليماتتىق وزگەرىستەر سالدارىنان كۇرت كوتەرىلگەنىن انىقتاعان. بۇل زەرتتەۋلەر ا ق ش پەن فرانسيانىڭ عارىش اگەنتتىكتەرى بىرلەسە جۇرگىزگەن «دجەيسون-3» جوباسىنىڭ اياسىندا جاسالدى. مامانداردىڭ مالىمەتى بويىنشا، تەڭىز دەڭگەيى 1992 - جىلدان بەرى ورتاشا ەسەپپەن العاندا 8 سانتيمەترگە كوتەرىلگەن. عالىمدار زەرتتەۋ ۇدەرىسى ءالى جالعاساتىنىن ايتادى.
«كوپتەگەن عالىمدار تەڭىز دەڭگەيى 2100 - جىلعا قاراي ءبىر مەترگە كوتەرىلەدى دەپ ەسەپتەيدى. باسقا ەسەپتەر بويىنشا، ءتىپتى ءبىر جارىم مەترگە دەيىن جەتۋى مۇمكىن. مىنە، وسى كەزدە ناعىز اپات بولماق»، - دەيدى NASA جوباسىنا قاتىسۋشى دجوش ۋيلليس.
بۇل ۇدەرىس جالعاسا بەرمەك. جەر شارىندا كليمات جىلىنىپ، ىستىق بولعان سايىن، مۇزدار ەرىپ، مۇحيتتار دەڭگەيى كوتەرىلە تۇسەدى.
عالىمدار بۇرىن ءجۇز جىلدا ءبىر رەت قانا بولىپ كەلگەن سۋ تاسقىندارى ەندى ءار 10 جىل سايىن قايتالاناتىندىعىن ايتىپ وتىر، دەپ حابارلايدى 24.kz.