ستۋدەنت نەدەن قورقادى؟

استانا. قازاقپارات - كۇلكىگە قالۋ. كەز كەلگەن دەنى دۇرىس كىسى سەكىلدى ستۋدەنت تە كوپشىلىك الدىندا ماسقارا بولۋدان قورقادى.
None
None

مۇنداي فوبيا ءبىرىنشى كۋرستا «بوتەن اۋديتوريادا قاتال وقىتۋشىعا بەرگەن جاۋابىم دۇرىس بولماي قالا ما» دەۋدەن باستالادى.

كىدىرىپ قالۋ مەن ۇيالۋ - جاۋاپ بەرىپ تۇرعاندا ەرىكسىز كەلەتىن ەپتەگەن ەموتسيا عانا. ال جاۋابىڭ دۇرىس ەمەس بولسا، قول دىرىلدەيدى، داۋىس دىرىلدەيدى، بەت قىزارادى، بارلىق بەلگى جۇزىڭىزگە شىعىپ تۇرادى. تاڭدانارلىعى، كەيبىرەۋلەردە قانشا ۋاقىت وتسە دە، نەشىنشى كۋرسقا كەلسە دە بۇل قورقىنىش كەتپەي قويادى. كۋرستىق جۇمىس تاپسىرۋ نە ديپلوم جۇمىسىن قورعاۋ كەزىندە بۇل قورقىنىشتان ءالى ارىلماعان بولساڭىز، ەموتسياڭىزعا يە بولا الماساڭىز، كىسىلىك كەلبەتىڭىزگە نۇقسان كەلىپ، وزىڭىزگە سەنىمسىز ادام بولىپ كورىنۋىڭىز مۇمكىن.

اقشا جوعالتۋ. مۇندا ءبارى دە تۇسىنىكتى. تەك «اۋىرماۋدىڭ جولىن ىزدەۋ كەرەك»، ياعني قوعامدىق كولىكتەرگە مىنگەندە، كوشەدە جۇرگەندە سومكەنىڭ اۋزى جابىق بولۋىن، اقشاڭىزدى ءقاۋىپسىز ورىندا ساقتاۋدى ەستەن ەش شىعارماعايسىز.

دەكاناتقا نە رەكتوراتقا شاقىرتۋ. كەز كەلگەن ستۋدەنت (ءتىپتى ۇزدىك بولسا دا) ساباقتان سوڭ دەكاناتقا نە رەكتوراتقا كەلۋىن ەسكەرتسە، بويى سۋىپ، ويىنا بىردەن جامان نارسە كەلەدى. ونى قورقىتاتىن دەكاننىڭ الدى نە جامان حابار ەمەس. وزىنە قاتىستى ايتىلار ناشار پىكىردەن قورقادى. ىشكى قينالىس اڭگىمە باستالعان سوڭ عانا باسىلادى.

ەمتيحاننان قۇلاۋ. ەمتيحان كەزىندە كوشىرگەنىمدى ءبىلىپ قويماسىن دەپ قورقۋ بىلاي تۇرسىن، قورىتىندى باعا شىققانشا اس باتپايتىن جايسىزدىق ءار ستۋدەنتكە تانىس بولار. ۇزدىك ستۋدەنت «ناشار باعا الىپ قالمايىن» دەپ ابىرجىسا، ورتاشا ستۋدەنت «شاكىرتاقىم ءۇزىلىپ قالماسىن» دەپ قوبالجيدى، ودان تومەن ستۋدەنت «ەكى الىپ، جازعى سەمەسترگە قالىپ قويماسام بولدى» دەپ تىلەيدى. مۇنداي مازاسىزدىقتىڭ الدىن الۋ ءۇشىن ءار تاقىرىپقا دەر كەزىندە دايىندالساڭىز بولدى. مالىمەتتى جاتتاپ الماي، ميىڭىزعا توقىپ الساڭىز، ەمتيحان كەزىندە اۋىزشا ساباقتارعا شپارگالكاسىز كىرىپ، ويىڭىزدا بارىن جازىپ شىعۋعا بولادى. ەسەسىنە ەشكىمنەن ۇرەيلەنبەي، «قالتاسىندا جاي تۇرعان شپارگالكاعا بولا دىرىلدەپ وتىراتىن» ستۋدەنتتەردىڭ قاسىندا ەركىن وتىراسىز.

ال ءسىزدىڭ بويىڭىزدا قانداي قورقىنىش بار، ستۋدەنت؟

massaget.kz

سوڭعى جاڭالىقتار