بانكتەردەن نەسيە الاتىن ءاربىر ءتورتىنشى كاسىپكەر مەملەكەت قولداۋىنا يە بولىپ وتىر - ع. لەسبەكوۆ

بۇل تۋرالى بۇگىن الماتىدا قازاقستاننىڭ باسەكەگە قابىلەتتىلىگىن ارتتىرۋ شەڭبەرىندە «حالىقارالىق قاتىناستار جۇيەسىنە ينتەگراتسيانى كۇشەيتۋ جانە بيزنەستى دامىتۋ» تاقىرىبى بويىنشا وتكەن سەمينار- كەڭەستە «دامۋ» كاسىپكەرلىكتى دامىتۋ قورى» ا ق باسقارۋشى ديرەكتورى - باسقارما مۇشەسى عابيت لەسبەكوۆ ءمالىم ەتتى.
«قازاقستاندا كاسىپكەرلەرگە مەملەكەت تاراپىنان باسقا تمد ەلدەرىنە قاراعاندا وتە جوعارى دەڭگەيدە قولداۋ كورسەتىلەدى. قازىر ەلىمىزدە «بيزنەستىڭ جول كارتاسى-2020» باعدارلاماسى جاڭارتىلعان تۇردە جۇزەگە اسىرىلىپ جاتىر. سونىڭ نەگىزىندە اسىرەسە ەكسپورتقا ءونىم شىعاراتىن كاسىپكەرلەردىڭ ۆاليۋتالىق تاۋەكەلدىگى بويىنشا مەملەكەت تاراپىنا كورسەتىلەتىن كومەكتى ايتۋعا بولادى.
قازىرگى تاڭدا ەلىمىزدە 285 كومپانيا وسى باعىت بويىنشا كومەككە يە بولدى. سونىمەن قاتار، كاسىپكەرلەرگە كورسەتىلەتىن مەملەكەتتىك كەپىلدەندىرۋ كومەگى بار. ول الىناتىن نەسيەنىڭ 50 پايىزدان 85 پايىزعا دەيىنگى بولىگىن قامتيدى. قازىر ەلىمىز بويىنشا 1000 نان اسا كاسىپكەر كەپىلدەندىرۋ باعدارلاماسى بويىنشا قولداۋعا يە بولدى. جالپى نەسيەلىك قورجىن - 1 تريلليون 200 مىڭ تەڭگەدەن استى. قازاقستاندا ەكىنشى دارەجەلى بانكتەردەن نەسيە الاتىن ءاربىر ءتورتىنشى كاسىپكەر وسىلايشا مەملەكەت قولداۋىنا يە بولىپ وتىر»، - دەدى ع. لەسبەكوۆ.
ايتا كەتەلىك، ەكسپورتقا تاۋار شىعاراتىن كومپانيالارعا ءتيىستى تالاپتار قويىلادى. ياعني، ولار ونىمدەرىنىڭ 10 پايىزدان كەم ەمەس بولىگىن ەكسپورتقا شىعارۋعا ءتيىس. سوندا ولاردىڭ، مولشەرلەمەسى 12 پايىز بولاتىن ۆاليۋتالىق نەسيەلەرىنىڭ 5 پايىزى مەملەكەت تاراپىنان كومەك قارجى رەتىندە وتەلەدى.
اۆتور: جاپپاربەرگەن ايبوتا