12:07, 25 - تامىز 2015 | GMT +5
زەينەتاقىلىق تولەمدەر مەن جاردەماقىلار بويىنشا ەشقانداي ماسەلە تۋىندامايدى - س. جاقىپوۆا
استانا. قازاقپارات - بارلىق الەۋمەتتىك مىندەتتەر ورىندالاتىن بولادى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر دەنساۋلىق ساقتاۋ جانە الەۋمەتتىك دامۋ ۆيتسە- ءمينيسترى سۆەتلانا جاقىپوۆا ءمالىم ەتتى.
«ەلباسىنىڭ تاپسىرماسىنا سايكەس، بارلىق الەۋمەتتىك مىندەتتەر ورىندالاتىن بولادى. وسى باعىتتا بارشا الەۋمەتتىك جانە زەينەتاقىلىق تولەمدەر مەن جاردەماقىلار اي سايىن ۋاقىتىلى تولەنىپ كەلەدى. بۇگىندە وسى تولەمدەردىڭ دەر كەزىندە ءارى تولىق اۋدارۋ بويىنشا پروبلەمالار تۋىنداپ وتىرعان جوق. سونىمەن قاتار 2016 -جىلى دا بارشا مىندەتتەمەلەر ورىندالاتىن بولادى»، - دەدى ءمينيستردىڭ ورىنباسارى.
ونىڭ سوزىنە قاراعاندا، 1 تريلليون 120 ميلليارد تەڭگە الەۋمەتتىك باعدارلامالارعا قاراستىرىلعان جانە بۇل قارجىنى يگەرۋ جوسپار بويىنشا ءجۇرىپ كەلەدى.
اۆتور: رۋسلان عابباسوۆ