استانا سپورتتان الەمدىك دودالاردى وتكىزۋگە ىڭعايلى قالا - حالىقارالىق دزيۋدو فەدەراتسياسى

استانا. قازاقپارات - قازاقستاندا الەمدىك دەڭگەيدەگى شارالاردى وتكىزۋگە حالىقارالىق سپورت فەدەراتسيالارى ۇلكەن سەنىممەن قاراپ وتىر.

بۇل تۋرالى بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆانىڭ حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەردى قابىلداۋى الدىندا ق ر مادەنيەت جانە سپورت ۆيتسە-ءمينيسترى ساكەن مۇسايبەكوۆ ءمالىم ەتتى.

 «24-30 -تامىز ارالىعىندا استاناداعى «الاۋ» مۇزايدىنىندا ەلىمىزدە الەم بىرىنشىلىگى وتكىزىلەدى. بۇل دوداعا الەمنىڭ 140 ەلىنەن سپورتشىلار قاتىسادى. اتاپ ايتقاندا، بۇعان دەيىن قازاقستاندا سپورتتىڭ وزگە تۇرلەرىنەن دە الەم چەمپيوناتتارى وتكەنىن بىلەسىزدەر جانە بۇل جارىستاردىڭ ۇيىمداستىرىلۋى دەڭگەيى جوعارى باعالانعان بولاتىن. ەلباسىنىڭ جۇرگىزىپ جاتقان ساياساتىنىڭ ارقاسىندا، سپورتتى دامىتۋعا نازار اۋدارۋ دەڭگەيىمىزدىڭ ناتيجەسىندە حالىقارالىق قوعامداستىق بىزگە ۇلكەن سەنىممەن قاراپ وتىر»، - دەدى ءمينيستردىڭ ورىنباسارى.

ونىڭ سوزىنە قاراعاندا، جەتى كۇنگە جالعاساتىن سايىسقا بارشا الەم ەلدەرى مەن قازاقستاننان جانكۇيەرلەر كەلىپ جاتىر جانە بۇگىندە بيلەتتەر تۇگەل ساتىلىپ كەتكەن ەكەن.

ءوز كەزەگىندە حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر وسىعان دەيىن استاناعا بىرنەشە مارتە ساپارمەن كەلگەنىن جانە شاھار قاتتى ۇناعاندىقتان الەم بىرىنشىلىگىن وسىندا وتكىزۋگە تاڭداۋ تۇسكەندىگىن اتاپ ءوتتى. «بۇل الەمدىك ءىرى چەمپيوناتتاردىڭ ءبىرى بولىپ وتىر، سەبەبى وسىندا 900 گە جۋىق سپورتشى قاتىساتىن بولادى. اتاپ ايتقاندا، دزيۋدو كۇرەسىنەن قازاقستاندا وتكەلى تۇرعان الەم چەمپيوناتى ەلدەرىڭىزدە سپورتتىڭ بۇل ءتۇرىنىڭ دامۋىنا جاڭا سەرپىن بەرەتىندىگىنە سەنىمدىمىن»، - دەدى م. ۆيزەر.

اۆتور: رۋسلان عابباسوۆ