استانادا بالا اسىراپ الۋشىلاردىڭ سانى ارتۋدا

بۇل تۋرالى بۇگىن استانادا وتكەن باسپا ءسوز ءماسليحاتىندا استانا قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ءتورايىمى ءنازيلا راززاق ءمالىم ەتتى.
«ازاماتتىق ىستەر بويىنشا بيىلعى ءبىرىنشى جارتىجىلدىقتا 266 تالاپ وتىنىشتەرى كەلىپ ءتۇسىپ، 214 ى قارالدى. 2014 -جىلمەن سالىستىرعاندا 45 ىسكە ارتىق بولدى. ولاردىڭ اراسىندا بالا اسىراپ الۋعا قاتىستى 102 ءىس بولسا، ال 43 ى اتا- انا قۇقىعىنان ايىرۋعا قاتىستى. اتاپ ايتقاندا، استانا بويىنشا بالا اسىراپ الۋعا بايلانىستى ىستەر ارتىپ كەلەدى. وكىنىشكە قاراي، باسقا وڭىرلەردەن كەلىپ، وسىندا بوسانىپ، بالالارىن تاستاپ كەتەتىن جاعدايلار ورىن الۋدا. ابىروي بولعاندا، بالالاردى اسىراپ الۋعا نيەتتى ادامدار بارشىلىق»، - دەدى ن. راززاق.
وسى ورايدا ول زاڭناماعا سايكەس بالا اسىراپ الۋشىلاردىڭ شەكتى جاسى 45 تەن اسپاۋى ءتيىس ەكەنىن ەسكە سالىپ ءوتتى. ءبىراق ادامدار وسى كورسەتىلگەن جاسقا جەتكەنەن كەيىن دە بالا اسىراپ الۋ تۋرالى شەشىمگە كەلىپ جاتادى.
«زەينەتاقىلىق قامتاماسىز ەتۋ تۋرالى زاڭ قابىلداندى. وندا ايەلدەردىڭ زەينەتاقىلىق جاسى 2018 -جىلدان باستاپ ارتادى جانە بۇل ءۇردىس 2027 -جىلعا دەيىن جالعاسادى. مەنىڭ ويىمشا، وسى باپتى پايدالانىپ، ناتيجەسىندە بالا اسىراپ الۋشىنىڭ جاسى 45 تەن اسىپ، 50 گە دەيىن جەتەتىندەي شارالاردى قابىلداۋعا بولاتىن سەكىلدى. ارينە، ءبىزدىڭ مەملەكەت جەتىم بالا اۋلەتتى جاعدايلاردا ءوسۋى ءۇشىن بارلىعىن جاساۋدا. الايدا ەگدە جاستاعى ادامدار بالانى ءوسىرىپ، جاقسى تاربيەنى بەرە الاتىنى ءسوزسىز»، - دەدى ول.
اۆتور: رۋسلان عابباسوۆ