12:10, 20 - تامىز 2015 | GMT +5
استانا پەداگوگتارىنىڭ تامىز كونفەرەنسياسى باستالدى
استانا. قازاقپارات - استانادا قالا باسشىسى ادىلبەك جاقسىبەكوۆتىڭ قاتىسۋىمەن ەلورداداعى ءبىلىم بەرۋ قىزمەتكەرلەرىنىڭ تامىز كەڭەسى باستالدى.

استانا قالالىق بىلىم بەرۋ باسقارماسىنىڭ جەتەكشىسى ەلميرا سۋحانبەرديەۆا اتاپ وتكەندەي، بيىلعى تامىز كونفەرەنسياسى «ءبىلىم بەرۋدىڭ مازمۇنىن جاڭارتۋ: بولاشاققا باعىتتاۋ» اتتى تاقىرىپتا ءوتىپ جاتىر.
ايتا كەتەيىك، استانا قالاسىندا ءارتۇرلى تيپتەگى 181 مەكتەپگە دەيىنگى بىلىم بەرۋ مەكەمەسى مەن 88 جالپى ورتا بىلىم بەرەتىن مەكتەپ بار. جاڭا وقۋ جىلىندا استانا قالاسىندا 3600 ورىنعا ارنالعان ءۇش جاڭا مەكتەپ اشىلادى.
جاڭادان اشىلاتىن مەكتەپتىڭ بىرى ەسىل اۋدانىندا، ورىنبور كوشەسى, 22/1 مەكەن جايى بويىنشا ورنالاسقان. بۇل مەكتەپتە 1200 بالا ءبىلىم الادى. تاعى 1200 ورىنعا ارنالعان ءبىر مەكتەپ كومسومول تۇرعىن ءۇي الابىنىڭ اۋماعىندا، 1200 بالانى بىلىممەن قامتيتىن ءۇشىنشى جاڭا مەكتەپ «باتىعاي» تۇرعىن ءۇي الابىندا سالىنعان.
اۆتور: كەنجەكەي توقتامۇرات قىزى