ءتىل كورسەتۋ امانداسۋدىڭ ءبىر ءتۇرى ەكەنىن بىلەسىز بە؟

استانا. قازاقپارات - جەر بەتىندە قانشا حالىق بولسا، سول حالىقتىڭ وزىنە عانا ءتان قىزىقتى، ەرەكشە، كەيدە ادام اقىلى جەتپەيتىن، بەلگىلى ءبىر ەرەجەگە باعىنبايتىن وعاش سالت- ءداستۇرى بار.
None
None

ارينە، سالت- ءداستۇردى، ادەت- عۇرىپتى ساقتاۋ بۇل حالىقتىڭ ءوز بولمىسىن ساقتاۋ بولىپ تابىلادى. سوندىقتان، قاي كەزدە دە ۇلتتىق ءداستۇردى قۇرمەتتەۋ كەرەك. وسى ورايدا، BNews.kz اگەنتتىگى الەم ەلدەرىنىڭ قىزىقتى سالت- داستۇرلەرىن نازارلارىڭىزعا ۇسىنىپ وتىر.

ءۇندىستاننىڭ كەيبىر اۋداندارىندا، سونىڭ ىشىندە، پەندجاب شتاتىندا ءۇشىنشى رەت نەكە قيۋعا تىيىم سالىنادى. ەكى رەت ۇيلەنۋگە بولادى، سونىمەن قاتار، ءتورتىنشى رەت وتباسىن قۇرۋعا دا قارسىلىق جوق.

الايدا، ءۇشىنشى رەت جار تاڭداۋعا ەش مۇمكىندىك بەرىلمەيدى. الايدا، بۇل تەك اداممەن نەكە قيۋعا عانا سالىناتىن تىيىم بولعاندىقتان، كەيبىر ءۇندىستاندىقتار ءۇشىنشى رەت اعاشقا ۇيلەنۋ ارقىلى تاعى دا وتباسىن قۇرۋعا رۇقسات الادى. ءيا، ءيا، اعاشقا. كادىمگى تامىر جايىپ وسەتىن، جاپىراعى بار اعاشقا. ۇيلەنۋ ءراسىمى اياقتالعان سوڭ، قوناقتار كۇيەۋ جىگىتكە نەكەلى «جارىنان» قۇتىلۋعا كومەكتەسەدى، ياعني، اعاشتى ارالاپ تاستايدى. مىنە، ەندى كەزەكتى رەت ۇيلەنە بەرۋگە بولادى. سول سياقتى، وزىنەن بۇرىن ءىنىسى ۇيلەنىپ قويعان جىگىتتەر دە وسى داستۇرگە جۇگىنۋگە ءماجبۇر.

ارگەنتينادا جاڭا جىل قارساڭىندا مەكەمە قىزمەتكەرلەرى ەسكى جىلدىڭ سوڭعى جۇمىس كۇنىندە قاجەتسىز قاعازداردى، ەسكى بلانكتەردى، كۇنتىزبەلەردى تەرەزەدەن لاقتىرادى. ەلدىڭ ىسكەرلىك ورتالىعى سانالاتىن بۋەنوس- ايرەستە كۇننىڭ ءبىرىنشى جارتىسىندا- اق جولدىڭ بەتى قابات- قابات قاعازعا تولىپ قالادى. ءبىر جىلى ءدال وسى سالتتى بەرىك ۇستانعان قىزمەتكەرلەر كوشەگە مەكەمەنىڭ بۇكىل مۇراعاتىن لاقتىرىپ تاستاعان كورىنەدى.

 ورتالىق نيگەريادا بويجەتكەن قىزداردى «سەمىرتۋ» بولمەلەرىنە ورنالاستىرۋ ءداستۇرى قالىپتاسقان. بويجەتكەندەردىڭ بولمەسىنە تەك ولاردىڭ انالارى عانا كىرە الادى جانە ولار ءوز قىزدارىنا ۇننان جاسالعان كوپتەگەن تاعامدار الىپ كەلەدى. سونداعى ماقسات -  قىزداردى سەمىرتۋ. بۇل تايپادا تولىق بولۋ ءساتتى تۇرمىسقا شىعۋدىڭ كەپىلى بولىپ سانالادى.

تيبەتتە سالەمدەسكەندە ءتىل شىعارادى. بۇل ءداستۇر ەلدى قاتىگەز لاندارما پاتشا باسقارعان  Ⅸ عاسىردان بەرى جالعاسىپ كەلەدى. پاتشانىڭ ءتىلى قاپ-قارا بولعان. ول ءوزى ولگەننەن كەيىن ءتىلى باسقا تيبەتتىكتەردىڭ تانىنە ەنىپ الۋى مۇمكىن دەپ قورىققان. سول سەبەپتى قولدارىن كەۋدەلەرىنە ايقاستىرىپ، ءبىر- بىرىنە ءتىل كورسەتىپ امانداسۋ ءداستۇرى قالىپتاسىپ كەتكەن. ەگەر، جول ءتۇسىپ، تيبەتكە بارىپ، وسى ءداستۇردى ۇستانا قالساڭىز، ءتىلىڭىزدى قارا تۇسكە بويايتىن ەشتەڭە جەمەگەنىڭىز ءجون. ايتپەسە، ءبىر تۇسىنبەۋشىلىك بولۋى ابدەن مۇمكىن.

 سول سياقتى، جاڭا زەلاندياداعى بايىرعى تايپالاردىڭ ءبىرى -  ماوري وكىلدەرى كەزدەسكەن كەزدە ءبىر- بىرىنە مۇرىندارىن تيگىزەدى. ال ساموالىقتار بولسا، يىسكەپ امانداسادى.

اندامانيا ارالدارىنىڭ بايىرعى تۇرعىندارى امانداسۋ كەزىندە سالەم بەرۋشىنىڭ تىزەسىنە وتىرىپ، ونى موينىنان قۇشاقتاپ جىلايدى. بۇل ونىڭ ءوز تايپالاسىن كورگەنگە قانشالىقتى قۋانىشتى ەكەنىن بىلدىرەدى.

مالايزيادا قانداي دا ءبىر زاتتى سۇق ساۋساقپەن كورسەتۋ ۇلكەن ادەپسىزدىك بولىپ سانالادى. جەرگىلىكتى حالىق باس بارماعىن قولدانادى. ال فيليپپيندىكتەر بۇل ماسەلەدە ادەپتى بولعانى سونشالىق، ولار زاتتى نەمەسە باعىتتى ەرىن نەمەسە كوز قوزعالىسىمەن كورسەتەدى.

گرەكيادا ءبي كەزىندە قالىڭدىق كۇيەۋ جىگىتتىڭ اياعىن باسۋعا تىرىسادى. ەگەر، قالىڭدىق مۇنى ىسكە اسىرسا، وندا وتباسىندا ونىڭ «ءبي» بولۋىنا مۇمكىندىگى بار دەگەن ءسوز.

اقمارال شاعاتاي

سوڭعى جاڭالىقتار