قازاق-قىرعىز شەكاراسىنىڭ اشىلۋى وتاندىق بيزنەستى باسەكەگە قابىلەتتى بولا تۇسۋگە يتەرمەلەيدى - يانا ىسقاقوۆا

الماتى. قازاقپارات - قىرعىزستاننىڭ ەۋرازيالىق ەكونوميكالىق وداققا ەنۋى جانە قازاق-قىرعىز شەكاراسىنىڭ اشىلۋى - قازاقستاندىق بيزنەس ءۇشىن تاعى ءبىر سىناق.

بۇل وتاندىق بيزنەستى باسەكەگە قابىلەتتى بولا تۇسۋگە يتەرمەلەيدى. بۇگىن «قازاقپارات» تىلشىسىنە بەرگەن سۇحباتىندا قازاقستاننىڭ وتباسىلىق بيزنەس قاۋىمداستىعى ۇيلەستىرۋ كەڭەسىنىڭ ءتورايىمى يانا ىسقاقوۆا وسىلاي ايتتى.

«قازىرگى تاڭدا، قازاقستاندىق وندىرۋشىلەردىڭ سانى اسا كوپ ەمەس، سايكەسىنشە وتاندىق ونىمدەر تۇتىنۋشىلار اراسىندا اسا تانىمال دا بولا قويعان جوق. سوندىقتان وندىرۋشىلەرىمىز الەۋەتىن ارتتىرىپ، وتاندىق نارىقتا بەرىك ورنىعۋى ءتيىس. بۇل ءۇشىن وتاندىق تۇتىنۋشىلار تاراپىنان قولداۋ قاجەت. ياعني، ولارعا قازاقستاندىق تاۋارلاردىڭ دا بارلىق ستاندارتتارعا جاۋاپ بەرە الاتىندىعىن جانە ساپالى ەكەندىگىن ءتۇسىندىرۋىمىز كەرەك»، - دەدى يا. ىسقاقوۆا،

ونىڭ ايتۋىنشا، كورشى ەلدە سوڭعى جىلدارى جەڭىل ونەركاسىپ جاقسى دامىپ جاتىر. سايكەسىنشە، شەكارا اشىلا سالىسىمەن وتاندىق نارىققا قىرعىزستاننىڭ ارزان باعالى تاۋارلارى كوپتەپ ەنە باستايدى. بۇل وتاندىق تاۋارلار ءۇشىن ۇلكەن باسەكە.

ايتا كەتەلىك، ەرتەڭ - 12- تامىزدا قازاقستان پرەزيدەنتى نۇرسۇلتان نازاربايەۆ پەن قىرعىزستان پرەزيدەنتى المازبەك اتامبايەۆ قازاق-قىرعىز شەكاراسىنىڭ ۋچاسكەسىندە كەدەندىك باقىلاۋدى الىپ تاستاۋ راسىمىنە قاتىسادى.

قىرعىزستان 2011-جىلى كەدەندىك وداققا كىرۋ تۋرالى شەشىم قابىلداعان بولاتىن. ال 2014-جىلى جەلتوقساندا ەۋرازيالىق ەكونوميكالىق وداققا ەنۋ تۋرالى كەلىسىم قابىلداندى. ۇستىمىزدەگى جىلى مامىر ايىندا بۇل تۋرالى حاتتاما تولتىرىلدى. كەيىن شىلدە ايىندا ك و قاتىسۋشى ەلدەرى قاجەتتى قۇجاتتاردى ماقۇلدادى.

اۆتور: جاپپاربەرگەن ايبوتا