ءۇي الۋ ءۇشىن بۇيرەكتەرىن ساتىپ جاتىر

استانا. قازاقپارات - نەپالداعى حوكسە ەلدى مەكەنىن بىلايعى جۇرت «بۇيرەك اۋىلى» اتاپ كەتكەن. ويتكەنى، اتالمىش ەلدى مەكەننىڭ كوپتەگەن تۇرعىنى باسپانالارى نەپالداعى ءزىلزالادان جەرمەن- جەكسەن بولعاندىقتان ءۇي الۋ ءۇشىن بۇيرەكتەرىن ساتىپ جاتىر.

 بۇل جايىندا «Daily Mail» اقپارات كوزى حابار تاراتتى. ماسەلەن، گيتا ەسىمدى حوكسە تۇرعىنىنىڭ ايتۋىنشا، تۋىسقانى ونى بۇيرەگىن ساتۋعا كوندىرگەن.

وسى ماقساتتا ول ءۇندىستاننىڭ وڭتۇستىگىنە اتتانىپ، ادام اعزالارىمەن زاڭسىز ساۋدا قىزىپ تۇرعان جەرگە كەلەدى. بۇيرەكتى الۋ وتاسى جارتى ساعاتقا سوزىلعان، وسىدان كەيىن نەپال تۇرعىنى ءۇش اپتا ەمحانادان شىققان جوق. ول ەكى مىڭ دوللارعا حوكسەدەن جەر تەلىمىن ساتىپ الىپ، تەك شاتىرى مەن بەرزەنتتەن تۇراتىن ءۇي تۇرعىزىپ الدى.

 ادام اعزاسىمەن ساۋدا جاسايتىندار وسىنداي مۇقتاج كەدەي اۋداندارعا كەلىپ، جۇرتتى اقشامەن قىزىقتىرىپ، اعزالارىن ساتۋعا ۇگىتتەيدى. بريتاندىق تىلشىلەردىڭ جازۋىنشا، بيلىك تاراپى بۇعان كوزجۇمبايلىق تانىتىپ وتىر، دەپ جازادى islam.kz.