ب. ساپاربايەۆ: كاسىپكەرلەر كىمنىڭ ارقاسىندا شالقىپ وتىرعانىن ۇمىتپاۋى ءتيىس
بۇل تۋرالى «قامشى» پورتالى ۆرەميا باسىلىمىنىڭ سايتىنا سىلتەمە جاساي وتىرىپ حابارلايدى.
«تۋعان جەرگە تاعزىم» اكسياسى اياسىندا پرەمەر- ءمينيستردىڭ ءبىرىنشى ورىنباسارى الدىندا 4 بىردەي وبلىس اكىمىنىڭ ورىنباسارلارى مەن الماتى قالاسى اكىمىنىڭ ورىنباسارى بايانداما جاساعان.
ءبىرىنشى بولىپ، الماتى وبلىسى اكىمىنىڭ ورىنباسارى باقتيار ونەربايەۆ مىرزا ءسوز تىزگىنىن الىپ، وڭىردەگى قالتالى ازاماتتاردىڭ حالىق يگىلىگى ءۇشىن جاساپ جاتقان جاقسىلىعىن ايتقان بولاتىن.
- جاقسىنىڭ جاقسىلىعىن ايت دەگەن عوي، كاسىپكەر باۋىرجان وسپانوۆ مىرزا ءوز قالتاسىنان قارجى ءبولىپ، لەپسى اۋىلىندا سپورت مەكتەبىن سالىپ بەردى. سونىمەن قاتار، جىلاندى اۋىلىندا سپورت كەشەنىن سالىپ، تىگىن سەحىن، ساياباق، كينوتەتر جانە فيزيكا- ماتەماتيكانى تەرەڭدەتىپ وقىتاتىن ليتسەي سالىپ بەردى. ال اتى ءماشھۇر سپورتشى جاقسىلىق اعا ۇشكەمپىروۆ جامبىل اۋدانىندا سپورت كەشەنىن اشتى. ال كاسىپكەر اباي ءسادۋاقاس ۇلى 120 ورىندىق مەكتەپ پەن 50 ورىنعا شاقتالعان جاڭا بالاباقشانى جامبىل اۋدانى تۇرعىندارىنا تارتۋ ەتتى، - دەپ ءسوزىن تۇيىندەدى باقتيار ونەربايەۆ. ال مينيستر مىرزا ورىنباساردىڭ ءسوزىن بولمەستەن، مۇقيات تىڭدادى دا، باسىن شۇلعىپ، ريزاشىلىعىن بىلدىرگەندەي بولدى. ءبىز وسىلاي قابىلدادىق.
ال الماتى قالاسى اكىمىنىڭ ورىنباسارى زاۋرەش امانجولوۆانى ۆيسە- پرەمەر ايامادى. الماتى قالاسىنداعى كاسىپكەرلەردى سىناعان ساپاربايەۆ كاسىپكەر نۇرلان سماعۇلوۆقا ەرەكشە توقتالدى.
- ءبىز سماعۇلوۆتىڭ قالاي بايىپ وتىرعانىن بىلەمىز. سەن مىناعان جاۋاپ بەرشى، زاۋرەش. سماعۇلوۆ جاڭاعى مەكتەپ، بالاباقشا، مادەنيەت ءۇيى مەن سپورت كەشەنىن ءوز قالتاسىنان اقشا شىعارىپ سالىپ بەردى مە؟، - دەپ سۇراقتى توتەسىنەن قويدى.
- مەن سماعۇلوۆ قانداي دا ءبىر قايىرىمدىلىققا مەكتەپ سالىپ بەردى دەپ ايتا المايمىن. ءبىراق ول الماتى قالاسىنداعى بارلىق شارالارعا بەلسەندى قولداۋ كورسەتىپ كەلەدى، - دەپ اقتالعانداي بولدى امانجولوۆا.
- ول «تۋعان جەرگە تاعزىم» سەكىلدى ماڭىزدى اكسياعا قاتىسۋى ءتيىس ەدى. ەلباسىنىڭ تاپسىرماسىن ۇمىتپاعان ءجون. ول ءبىلۋى ءتيىس، كىمنىڭ ارقاسىندا ميللياردەر اتانعانىن، - دەپ شامىرقانعان ساپاربايەۆ ءسوزىن ءارى قاراي جالعادى.
- نۇرلان سماعۇلوۆ قازاقستاننىڭ بارلىق جەرىنە ساۋدا ورتالىقتارىن سالىپ تاستاۋعا شاماسى جەتەدى. ال الماتى قالاسىندا بالاباقشا جەتىسپەۋشىلىگى باستى ماسەلەلەردىڭ ءبىرى ەكەنىن ول بىلە مە؟ ايتۋ كەرەك، بالاباقشا سالىپ بەرسىن، ايتپەسە ءوزىنىڭ كوپ كوتتەدجىنىڭ ءبىرىن بەرسىن. ءوزى جاۋتىكوۆ مەكتەبىنىڭ تۇلەگى. نەگە سول سەكىلدى ۇلكەن مەكتەپ سالىپ بەرمەسكە. وعان نەگە مارقۇم بولعان نۇرلان قاپپاروۆتان ۇلگى الماسقا؟ نەگە ءسىز نەمەسە احمەتجان ەسىموۆ ونىمەن سويلەسپەيدى؟ نەگە ايتپايسىڭدار وعان؟ ول بار قارجىسىن ساۋداعا عانا سالىپ وتىر. بىزگە مەكتەپ، بالاباقشا كەرەك دەپ ايتپايسىڭدارما؟ ارينە، قازاقستاننىڭ ەكونوميكاسىن كوتەرۋ ءۇشىن، جاڭا جۇمىس ورىندارىن اشۋ ءۇشىن، سالىق ءۇشىن ساۋدا ماڭىزدى. ءبىراق، ول ەلباسىنىڭ باستامىسن قولداۋى كەرەك ەدى، - دەدى بەردىبەك ماشپەك ۇلى.
ال مينيستر مىرزانىڭ سوگىسىنە جاۋاپ قاتا الماعان ورىنباسار حانىم ءۇنسىز باسىن شۇلعىپ وتىردى.
- مىنانى ءبىزدىڭ ەلدەگى قالتالى كاسىپكەرلەردىڭ ەسىنە سالاتىن ۋاقىت جەتتى. ولاردىڭ ءارقايسىسى ەلباسىنىڭ كورەگەن ساياساتىنىڭ جانە تاۋەلسىزدىكتىڭ ارقاسىندا بايىپ، شالقىپ وتىر. ولاردىڭ ءارقايسىسى وزدەرىن باپتاعان، وسىرگەن تۋعان اۋىلدارىنا مەكتەپ، بالاباقشا سەكىلدى الەۋمەتتىك ماڭىزدى نىساندار سالىپ بەرۋگە شامالارى جەتەدى ەمەس پە؟ ! بۇل ازاماتتىق ءارى ادامگەرشىلىك پارىزدارى عوي. ادام ءۇشىن تۋعان جەردەن ارتىق قانداي بايلىق بار. سونى ويلانۋ كەرەك، - دەدى ق ر پرەمەر- ءمينيسترىنىڭ ءبىرىنشى ورىباسارى بەردىبەك ماشپەك ۇلى.
نۇرگەلدى ءابدىعاني ۇلى
«قامشى» سىلتەيدى
