ن. نازاربايەۆ لاڭكەستىكپەن كۇرەستە ءبىرىڭعاي حالىقارالىق ءتارتىپتى ايقىنداۋ كەرەك ەكەنىن ايتتى

 ۋفا. قازاقپارات - ق ر پرەزيدەنتى نۇرسۇلتان نازاربايەۆ لاڭكەستىكپەن كۇرەستە ءبىرىڭعاي حالىقارالىق ءتارتىپتى ايقىنداۋ كەرەك دەپ ەسەپتەيدى.

بۇل تۋرالى بۇگىن ول ۋفاداعى ش ى ۇ مەملەكەت باسشىلارى كەڭەسىنىڭ كەڭەيتىلگەن وتىرىسىندا ايتتى.

«21 - عاسىردىڭ باسىندا لاڭكەستىك شابۋىلداردان زارداپ شەككەندەردىڭ سانى 5 ەسەگە ارتىپ، شامامەن 150 مىڭ ادامدى قۇرادى. مۇنىڭ 80 پايىزدان استامى ازيا، تاياۋ شىعىس جانە افريكا ەلدەرىندە بولىپ جاتىر. «د ا ي ش»، «بوكو حارام»، «تاليبان»، «ءال- كايدا» دەپ اتالاتىن ءتورت ۇيىم بەيبىت ازاماتتارعا قارسى قىلمىستىڭ شامامەن 70 پايىزىن جاسادى»، - دەدى ن. نازاربايەۆ.

 بۇل دەرەكتەر ش ى ۇ- عا مۇشە ەلدەردىڭ قاۋىپسىزدىگىنە نۇقسان كەلتىرۋى مۇمكىن، دەدى ق ر پرەزيدەنتى.

«قازىرگى قاتىگەزدىكتىڭ ماقساتقا جەتۋ جولىنداعى يدەولوگياسى مەن قيمىلدارى بارلىق ءدىننىڭ نەگىزى مەن فيلوسوفياسىنا قايشى. ازاماتتارىمىزدىڭ تەرروريستەر جاعىندا كۇرەسۋى وزەكتى ماسەلەگە اينالدى، سوندىقتان بۇل قاۋىپكە قارسى تۇرۋدىڭ ءبىرىڭعاي حالىقارالىق ءتارتىبىن انىقتايتىن كەز كەلدى»، - دەپ اتاپ ءوتتى ن. نازاربايەۆ.

ق ر پرەزيدەنتى ش ى ۇ ەكسترەميزممەن كۇرەسۋگە دايىن الەمدىك قاۋىمداستىق مۇشەلەرى اراسىندا ديالوگ ورناتۋعا ءوز ۇلەسىن قوسۋى ءتيىس ەكەنىن ايتتى.

«سوندىقتان تەرروريزممەن كۇرەسۋ بويىنشا الەمدىك ءبىرىڭعاي جۇيە قۇرۋ ءۇشىن الداعى ب ۇ ۇ اسسامبلەياسىنىڭ كۇن تارتىبىنە وسى ماسەلەنى ەنگىزگەن دۇرىس. لاڭكەستىك پەن ەكسترەميزم جانە سەپاراتيزممەن كۇرەس تۋرالى ش ى ۇ باعدارلاماسىن قابىلداۋ، تەرروريزممەن كۇرەستەگى ورتاق كونۆەنتسياعا اينالادى دەپ ۇمىتتەنەمىن»، - دەدى ن. نازاربايەۆ.