باتىر ارۋلار بايقاۋى قاتىسۋشىلارى جۇكتەلگەن تاپسىرمالاردى مۇلتىكسىز ورىندايتىندىقتارىن دالەلدەدى - فوتو
ونىڭ بارىسىندا ايەل اسكەري قىزمەتشىلەر توزىمدىلىك كۋرسىن، لاڭكەستىككە قارسى وپەراتسيانى، جاۋ بەكىنىستەرىن شابۋىلداۋ، اۆتوماتتار مەن تاپانشالاردان وق اتۋ، كالاشنيكوۆ اۆتوماتىن بولشەكتەۋ جانە قۇراستىرۋ كۋرسىنان ءوتتى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
«باتىر ارۋلار» ءىس جۇزىندە جاۋىنگەرلىك ازىرلىكتىڭ بارلىق داعدىلارىن مەڭگەرگەندىكتەرىن كورسەتتى.
تانكتىڭ استىندا جاتۋ، كەدەرگىلەر جولاعىن بۇزىپ ءوتۋ، جاۋىنگەرلىك قارۋدان وق اتۋ جاۋىنگەرلىك دايارلىقتى تەكسەرۋ كەزەڭىنە كىردى. بايقاۋعا قاتىسۋشىلار اتىس قارۋىنىڭ ۇلگىلەرىن ينجەنەرلىك تۇرعىدا ءبىلۋ جانە اتىس ماشىعىن، جاۋىنگەرلىك جاراقتاندىرۋدا كەدەرگىلەر جولاعىن ەڭسەرۋ كەزىندەگى شىدامدىلىقتى، «كوبرا» بروندى ماشيناسىن باسقارۋ شەبەرلىگىن پاش ەتتى.
قىز- كەلىنشەكتەر ءۇشىن ەڭ ەلەۋلى سىناق تانكتىڭ استىندا جاتۋ بولدى. بۇل جاتتىعۋ اسكەري قىزمەتشىلەردىڭ پسيحولوگيالىق دايىندىعىن تەكسەردى. الايدا، «باتىر ارۋلار» جەڭىمپازدارى شامالى تولقۋعا قاراماستان، ق ر ق ك شىن مانىندەگى اسكەري قىزمەتشىلەرى رەتىندە بۇل سىناقتى دا باعىندىردى.
سوڭعى سىناقتاردىڭ ءبىرى سۋدا جاتتىقتىرۋ ءىس- قيمىلدارىن قارقىندى پىسىقتاۋ بولدى. ايەل اسكەري قىزمەتشىلەر تولىق جاۋىنگەرلىك امۋنيتسيادا ءجۇزىپ ءوتتى جانە ۋاقىتقا بەلگىلى ءبىر قاشىقتىقتى باعىندىردى. قاتىسۋشىلاردىڭ تاپسىرماسى قارۋ اسكەري قىزمەتشىلەردىڭ وزىمەن بىرگە بولۋىمەن كۇردەلەنە ءتۇستى.
بايقاۋ جەڭىمپازدارىن رەسمي ماراپاتتاۋعا دەيىن از ۋاقىت قالعانىن ەسكە سالا كەتەيىك. اسكەري قىزمەتشىلەر ۇدايى جاۋىنگەرلىك ازىرلىكتە، ولارعا جۇكتەلگەن تاپسىرمالاردى ءارقاشان مۇلتىكسىز ورىندايتىندارىن دالەلدەدى.
