ن. نازاربايەۆ: قازاقستان مەن رەسەيدەگى سەكىلدى بارىنشا جاقىن ءارى مەيلىنشە سەنىمدى قاتىناس ەشبىر ەلدە جوق

استانا. قازاقپارات - قازاقستان مەن رەسەيدەگى سەكىلدى بارىنشا جاقىن ءارى مەيىلىنشە سەنىمدى قاتىناس ەشبىر ەلدە جوق.

«روسسيا 24» تەلەارناسىنداعى «فورمۋلا ۆلاستي» باعدارلاماسىندا سۇحبات بەرگەن قر پرەزيدەنتى نۇرسۇلتان نازاربايەۆ وسىلاي مالىمدەدى. باعدارلاما اۆتورى ءارى جۇرگىزۋشىسى ميحايل گۋسمان سۇحبات بارىسىندا قازاقستان مەن رەسەيدىڭ قارىم- قاتىناسى تۋرالى سۇراعان بولاتىن.

«مەن قازاقستان مەن رەسەيدەگى سەكىلدى بارىنشا جاقىن ءارى سەنىمدى قارىم- قاتىناس ەشكىمدە جوق دەپ ويلايمىن. ءتىپتى 1991 -جىلى كەڭەس وداعى ىدىراعان تۇستا دا، بۇنداي قاتىناسقا سىزات تۇسكەن ەمەس»، - دەدى ەلباسى.

بۇدان بولەك، ەلباسى ەۋرازيالىق ەكونوميكالىق وداقتىڭ پەرسپەكتيۆاسى تۋرالى ساۋالعا دا جاۋاپ بەردى.

«قازاقستان مەن رەسەيدىڭ ەرىك- جىگەرى ارقاسىندا قۇرىلعان ەۋرازيالىق ەكونوميكالىق وداق بۇل ەڭ الدىمەن دۇرىس ينتەگراتسيا. ءبىز دۇرىس باعىتتا جىلجىپ كەلەمىز»، - دەپ اتاپ ءوتتى ق ر پرەزيدەنتى.

بۇل رەتتە ەلباسى ەۋروپا مەن ازيانىڭ ءبىر- بىرىنە قاشاندا قاجەت ەكەنىن العا تارتتى.

 «ەۋروپاعا ءبىزدىڭ رەسۋرستارىمىز، ال بىزگە ولاردىڭ عىلىمى، تەحنولوگياسى قاجەت، ياعني ءبىز ءبىر- ءبىرىمىزدى ءوزارا تولىقتىرىپ تۇرامىز. مەن قالىپتى كەزەڭدەر كەلەتىنىنە سەنەمىن، ءبىزدىڭ ەكونوميكا ساياساتتان تىس، شىنىمەن دە ازاماتتاردىڭ جاعدايىن جاقسارتۋى ءۇشىن ءومىر سۇرەتىن بولادى»، - دەدى ن. نازاربايەۆ.

 بۇل رەتتە مەملەكەت باسشىسى ەۋرازيالىق ىنتىماقتاستىڭ كەڭەيە تۇسەتىنىنە سەنىم ءبىلدىردى. پرەزيدەنتتىڭ سوزىنە قاراعاندا، بۇگىنگى قولعا الىنىپ جاتقاننىڭ بارلىعى وسى باعىتتا بولىپ تابىلادى.

«ماسەلەن، جىبەك جولى يدەياسىن الىپ قارايىق، بۇل وسى جولدىڭ بويىنداعى ەكونوميكانى دامىتۋ ەمەس پە؟ بۇنىڭ ءوزى بىرلەستىك. تىنىق مۇحيتىنان باتىس ەۋروپاعا دەيىن ءقازىر اۆتوكولىك جولدارىن سالىپ جاتىرمىز. ال بۇل ەۋروپا مەن ازيا ەمەس پە؟ مىنە، ءبىز وسىعان ءتۇبى جەتەمىز»، - دەدى ن. نازاربايەۆ.

اۆتور: قانات مامەتقازى ۇلى