بابالار ءسوزى: قازىعۇرتتىڭ باسىندا كەمە قالعان
***
حالىق اراسىندا قازىعۇرت تاۋى حاقىندا بۇرىننان قالعان اڭىز بار. قارت ادامداردىڭ ايتۋلارىنا قاراعاندا، قۇداي باستا جەردى، كوكتى جاراتقاندا، قازىعۇرت تاۋى دا بىرگە جارالعان.
ءوزى الاسا تاۋ بولسا دا، جەر جۇزىندەگى تاۋلاردىڭ قاسيەتتىسى. ىلگەرىدە جەر ءجۇزىن توپان سۋى باسىپ كەتكەندە قازىعۇرت تاۋى امان قالعان ەكەن. قازىعۇرت تاۋىنىڭ باسىندا، كۇنباتىس جاعىندا ازىراق تەگىس جەر بار. ول جەر نۇق پايعامباردىڭ كەمەسىنىڭ ورنى دەيدى.
قازىعۇرتتىڭ باسىندا ءبىر ۇڭگىر بولسا كەرەك. ول ۇڭگىردىڭ ۇستىنە اعاش شانشىپ قويعان قازىعۇرت اتانىڭ مولاسى دەيدى ەكەن. باسقا جەرلەردى بۇلت باسسا دا، قازىعۇرتتىڭ باسىن بۇلت شالمايدى ەكەن. ەگەردە قازىعۇرتتىڭ باسىنا بۇلت شوگىپ، كورىنبەي قالسا، قاريالار قازىعۇرت قاراسىن كيدى دەپ، قاتىندار كۇلپاراسىن كيەدى ەكەن. سول ۋاقىتىندا جۇرتتىڭ ءبارى دالاداعى نارسەلەرىن ۇيگە قويادى ەكەن، قازىعۇرتتىڭ باسىن جاپقان بۇلت جاۋماي كەتپەس دەپ، قازاقتاردىڭ بۇرىنعى زامانداعى اقىندارى نۇق پايعامباردىڭ كەمەسىنەن قالعان جانۋارلار تۋرالى مىنانى ايتادى ەكەن:
قازىعۇرتتىڭ باسىندا كەمە قالعان،
ول «اۋليە» بولماسا، نەگە قالعان؟
جەتىم بوتا ۇستىندە جاتىپ قالىپ،
ويسىلقارا جانۋار سودان قالعان.
قازىعۇرتتىڭ باسىندا كەمە قالعان،
ول «اۋليە» بولماسا، نەگە قالعان؟
قىرشاڭقى تاي ۇستىندە جاتىپ قالىپ،
قامبار اتا جانۋار سودان قالعان.
قازىعۇرتتىڭ باسىندا كەمە قالعان،
ول «اۋليە» بولماسا، نەگە قالعان؟
تىشقاق تانا ۇستىندە جاتىپ قالىپ،
زەڭگىبابا جانۋار سودان قالعان.
قازىعۇرتتىڭ باسىندا كەمە قالعان،
ول «اۋليە» بولماسا، نەگە قالعان؟
قوتىر توقتى ۇستىندە جاتىپ قالىپ،
شوپان اتا جانۋار سودان قالعان.
وسىنداي ىرىممەن ءتۇرلى جانۋارلاردىڭ اتىن كەلتىرەدى ەكەن.
قازىعۇرتتىڭ باسىندا كوپ «اۋليە»،
مىنسەڭ اتتاي جەلەدى ايىر تۇيە، - دەگەن ماقالدار دا بار.
