رەپ ءان ايتىپ، بۇكىل ەلگە تانىمال بولعان سايلاۋبەكتى مازاق ەتكەندەر سوتقا تارتىلاتىن بولدى
ەندىگى جەردە ولار باۋىرلارىنا اراق بەرىپ، وزىنە عانا تۇسىنىكتى تىلدە ءان ايتقىزىپ، عالامتورعا سالعانداردى سوتقا بەرەدى، - دەپ حابارلايدى «ك ت ك» تەلەارناسى.
تۋىستارىنىڭ ايتۋىنشا، قازىر ۇيدەن مازا كەتكەن. سەبەبى، بىرگە سۋرەتكە تۇسپەكشى بولىپ، سايلاۋبەكتى ارنايى ىزدەپ كەلەتىندەر كۇن-تۇنگە قارامايدى ەكەن. قىزىق ىزدەگەن جۇرتتىڭ بۇل قىلىعىنا ابدەن اشىنعان سايلاۋبەكتىڭ باۋىرلارى تەلەارنا تىلشىلەرىنە سۇحبات بەردى.
سايلاۋبەكتىڭ وتباسىنداعى وزگە 8 بالا قازىرگى ۋاقىتتا اتىراۋ وڭىرىنە بەلگىلى عالىم- وقىتۋشىلار ەكەن.
«9 بالامىز. 5 ۇل، 4 قىز. بارلىعىمىز دا ەلگە قىزمەت ەتىپ جاتىرمىز. ءبىراق، بەس ساۋساق بىردەي ەمەس دەيدى. ءبىزدىڭ ورتامىزدان وسىنداي ىنىشەگىمىزدىڭ كەلەڭسىز جاعىنان كورىنگەنى وتە وكىنىشتى. اينالاداعى ادامدار پايدالانىپ، ونى جامان جاعىنان كورسەتكەنى بىزگە وتە باتىپ تۇر»، - دەدى سايلاۋبەكتىڭ اپايى ءاليا قابدىحاميت.
ال سايلاۋبەكتىڭ قارىنداسى جانارگۇل قابدىحاميتتىڭ ايتۋىنشا، ولار قاتال شاراعا بارۋعا ءماجبۇر. «ەگەر دە جاي ءسوزدى ءتۇسىنۋ كەرەك. سايلاۋبەكتىڭ سوڭىنان قالماي تۇسىرۋلەرىن قويمايتىن بولسا، بىزدەر قۋىنىپ، زاڭدى ورىندارعا ارىزدارىمىزدى بەرەمىز. جانە شارا قولدانۋعا ءازىرمىز، جانۇيا اتىنان ايتارىمىز سول»، - دەدى ول.
سونىمەن قاتار، سايلاۋبەكتىڭ باۋىرلارى تەلەارنا تىلشىلەرىنە ونىڭ قانداي ەكەنىن ايتىپ بەردى. ايتۋلارىنشا، سايلاۋبەك مەكتەپتە ءتىل مەن ادەبيەتكە، ءان-جىرعا وتە جاقىن بولعان. ءتىپتى، ءتۇرلى جارىستارعا قاتىسىپ، جۇلدەلى ورىنداردى دا يەمدەنگەن. مۇنى سايلاۋبەكتىڭ ءوزى دە راستاپ وتىر. ءسىز بەن ءبىز تۇسىنە بەرمەيتىن تىلدە ءان ايتاتىن ول بۇگىن ماحامبەتتىڭ جىرىن وقىپ بەردى.
سايلاۋبەكتىڭ ايتۋىنشا، كوپشىلىككە بەلگىلى بولامىن دەگەن وي ءۇش ۇيىقتاسا تۇسىنە كىرمەگەن. تەك الدەكىمدەر مۇنىڭ ءان ايتقانىن كامەراعا ءتۇسىرىپ الىپ، عالامتورعا سالىپ جىبەرگەن. سايلاۋبەكتىڭ ءوزى ءىستىڭ بۇلايشا ناسىرعا شاۋىپ كەتەتىنىن بىلمەدىم دەيدى.
سايلاۋبەك قابدىحاميتتىڭ ايتۋىنشا، ول ءاندى ءوزى ءۇشىن ايتىپ جۇرگەن. «بىلاي ءوزىم ءۇشىن ايتىپ ءجۇردىم. ونداي وي بولعان جوق، شىعىپ كەتەم دەگەن. ەستىگەن ولەڭدەر عوي بۇرىنعى».
«سايلاۋبەك وزگەلەر ايتىپ جۇرگەندەي ەمەس، اقىل- ەسى ساۋ ادام. ورتا كاسىبي ءبىلىم العان. ۇيلەنبەگەن. تەك اشى سۋعا اۋەستىگى بار ەكەن. اۋىزىنا اراق تيسە وزگەرىپ سالا بەرەتىن سايلاۋبەكتىڭ باۋىرلارىنىڭ كوپشىلىكتەن ەندىگى سۇرارى - ونى جايىنا قالدىرۋ. ايتپەسە، قىزىق قۋعاندار قۇقىق قورعاۋ ورگاندارى الدىندا جاۋاپ بەرمەك»، - دەپ حابارلادى تىلشىلەر.
