بالقاش كولىنە ايەل ادام ەكى جاسار بالاسىمەن بىرگە باتىپ كەتتى
«سۋعا كەتكەن ايەل مەن بالانىڭ دەنەلەرىن جاعالاۋعا جاقىن جەردە دەمالۋشىلار بايقاعان. وقيعا ورنىنا كەلىپ جەتكەن سۇڭگۋىرلەر ولاردىڭ جانسىز دەنەلەرىن سۋدان الىپ شىقتى. سۋعا باتقان ادامداردىڭ تۇلعالارى انىقتالدى. ول اناسى مەن كامەلەتتىك جاسقا جەتپەگەن بالاسى بولىپ شىقتى»، - دەپ باياندادى بالقاش سۋ- قۇتقارۋ ستانساسىنىڭ باستىعى دارحان قۋانبايەۆ.
پوليتسيا اناسى مەن بالاسىنىڭ قازا تابۋ جاعدايىن انىقتاۋ ۇستىندە. قاي جەردە سۋعا باتقاندارى انىقتالماعان، دەنەلەرى جاعاجايعا تولقىنمەن شىعىپ قالعان. نۇسقالاردىڭ ءبىرى بويىنشا، ايەل سۋعا ءتۇسىپ كەتكەن بالاسىن قۇتقارماق بولىپ، اقىرى ەكەۋى دە كوز جۇمعان. اناسىنىڭ ۇستىندە كيىم بولعان.
سۋ- قۇتقارۋ قىزمەتىنىڭ اقپاراتىنشا، وتكەن دەمالىس كۇندەرى قاراعاندىداعى فەدوروۆ سۋ قويماسىندا 41 جاستاعى ەر ادام سۋعا كەتتى. سۇڭگۋىرلەر ونىڭ دەنەسىن جاعالاۋدان 15 مەتر جەردەن تاۋىپ الدى.
