تۋنيستەگى شابۋىلعا بايلانىستى ءبىر توپ كۇدىكتى ۇستالدى

استانا. قازاقپارات - تۋنيس بيلىگى كۋرورتتى سۋس جاعاجايىندا ادامدارعا شابۋىل جاسادى دەگەن كۇدىكپەن ءبىر توپ ادامدى ۇستادى، دەپ جازادى بي-بي-سي.

ءتۋنيستىڭ ىشكى ىستەر ءمينيسترى نادجەم گارسالليدىڭ سوزىنە قاراعاندا، ءبىر توپ كۇدىكتى ۇستالدى، الايدا ول ناقتى قانشا ادامنىڭ قولعا تۇسكەنىن اتامادى.

تۋنيس بيلىگى شابۋىل جاساعان ادام ليۆياداعى جيھادشىلار لاگەرىندە وقۋدان وتكەنىن، نە وتپەگەنىن انىقتاپ جاتىر.

Imperial Marhaba قوناق ءۇيىنىڭ جاعاجايىندا تۋريستەرگە وق اتقان ادامنىڭ قولىنان 38 ادام زارداپ شەكتى. دەنى بريتانيا ازاماتتارى.

جەكسەنبى كۇنى تۋنيستە قازا تاپقان ازاماتتاردى ەسكە الۋ قۇرمەتىنە ۇلى بريتانيا پرەمەر-ءمينيسترىنىڭ رەزيدەنتسياسىنداعى جانە وزگە دە مەملەكەتتىك مەكەمەلەردەگى تۋلار ءتۇسىرىلدى.

 ءتۋنيستىڭ پرەمەر-ءمينيسترى حابيب ەسسيد قاۋىپسىزدىك شارالارىنىڭ كۇشەيتىلگەنىن ايتتى.