قازاقستان مەن ۋكراينا پرەزيدەنتتەرى پ. پوروشەنكونىڭ استاناعا جاسايتىن ساپارىن تالقىلادى
استانا. قازاقپارات - ەلباسى نۇرسۇلتان نازاربايەۆ ۋكراينا پرەزيدەنتى پەتر پوروشەنكومەن تەلەفون ارقىلى سويلەستى. بۇل تۋرالى اقوردانىڭ رەسمي سايتىندا حابارلاندى.
اڭگىمەلەسۋ بارىسىندا پ. پوروشەنكو قول جەتكىزىلگەن بۇرىنعى ۋاعدالاستىقتارعا سايكەس ۋكراينا قازاقستاننىڭ دۇنيەجۇزىلىك ساۋدا ۇيىمىنا كىرۋ ۇدەرىسىن قولداعانىن ايتتى. نۇرسۇلتان نازاربايەۆ كورسەتكەن قولداۋى ءۇشىن ۋكراينا پرەزيدەنتىنە ريزاشىلىق ءبىلدىردى.
ەكى ەلدىڭ كوشباسشىلارى ەكىجاقتى ىنتىماقتاستىقتىڭ وزەكتى ماسەلەلەرىنە قاتىستى پىكىر الماسىپ، الداعى ۋاقىتتا وتەتىن قازاقستان- ۋكراينا ەكونوميكالىق ىنتىماقتاستىق ماسەلەلەرى جونىندەگى بىرلەسكەن مەملەكەتارالىق كوميسسيا وتىرىسىندا جەمىستى ناتيجەلەرگە قول جەتكىزىلەدى دەپ ۇمىتتەنەتىندەرىن ايتتى.
قازاقستان مەن ۋكراينا پرەزيدەنتتەرى پ. پوروشەنكونىڭ استاناعا جاسايتىن الداعى ساپارىن دا تالقىلادى.
تەلەفون ارقىلى سويلەسۋگە ۋكراينا جاعى باستاماشى بولدى.
