ق ر پرەزيدەنتى بەلگىلەپ بەرگەن جاڭا رەفورمالاردىڭ ىسكە اساتىنىنا ەش كۇمان جوق - تاتارستاننىڭ تۇڭعىش پرەزيدەنتى م. شايميەۆ

 استانا. قازاقپارات - رەسەيلىك كورنەكتى ساياساتكەر، تاتارستان رەسپۋبليكاسىنىڭ بۇرىنعى پرەزيدەنتى، قازىرگى مەملەكەتتىك كەڭەسشى مينتيمەر شايميەۆ «قازاقستان» تەلەارناسىنىڭ وسى وڭىردەگى مەنشىكتى ءتىلشىسى نۇرتاس سولتان ۇلىنا ەكسكليۋزيۆتى سۇحبات بەردى.

تاتارستاندى 20 جىلعا جۋىق باسقارعان كورنەكتى تۇلعانىڭ قازاقستانعا، ونىڭ پرەزيدەنتىنە دەگەن ىقىلاسى ەرەكشە.

ءتۇبى ءبىر تۇركى بالاسى سانالاتىن قازاق پەن تاتار حالقىن ورتاق تاريح قانا ەمەس، قازىرگى زامانداعى ساۋدا- ەكونوميكالىق بايلانىس تا بەرىك بايلانىستىرىپ تۇر. سوندىقتان تاتار تاراپى ءبىزدىڭ ەلىمىزدە بولاتىن وقيعالاردى ءجىتى نازاردا ۇستاپ وتىرادى. تىلشىمەن بولعان اڭگىمە بارىسىندا مينتيمەر شايميەۆ ەلىمىزدىڭ وسى ۋاقىتقا دەيىنگى دامۋىنا جوعارى باعا بەردى.

سونىمەن قاتار ول، «ءبىز كورشى، ءارى باۋىرلاس قازاقستاننىڭ قالاي دامىپ جاتقانىنا بەي- جاي قاراي المايمىز. مەن «الەمدەگى ەڭ دامىعان 50 ەلدىڭ قاتارىنا قوسىلۋ تۋرالى» مىندەتتىڭ مەرزىمىنەن بۇرىن ورىندالعانىن بىلەمىن. بۇل ايتۋعا وڭاي بولعانمەن، ءىس جۇزىندە تاۋەكەلى زور، ۇلكەن سىناق بولدى. قازاق ەلىنىڭ ادامي پوتەنتسيالى زور، عىلىمي- تەحنيكالىق مۇمكىندىگى جوعارى جانە قازبا بايلىقتاردىڭ قورى مول. نۇرسۇلتان نازاربايەۆتاي سۇڭعىلا ساياساتكەر وسىنىڭ ءبارىن ساۋاتتى تۇردە بىرىكتىرىپ، ورتاق ماقساتقا جۇمىلدىرا ءبىلدى» دەي كەلە، جاقىندا وتكەن سايلاۋدىڭ ناتيجەسى، ەلدىڭ دۇرىس باعىتتا بارا جاتقانىن جانە وسى جولدا، حالىقتىڭ كوشباسشىسىنا تولىقتاي سەنىم كورسەتكەنىن ريزاشىلىقپەن ەسكە الدى.

قازاقستان ءوز دامۋىندا كەزدەيسوق جولعا تۇسكەن ەمەس. ەلىمىز ۇنەمى ايقىن ماقسات، بەلگىلى باعدار، جۇيەلى جوسپارمەن ءجۇردى. سوندىقتان پرەزيدەنت ۇسىنعان 5 ينستيتۋتسيونالدى رەفورما، وسى جىلدار بويعى جۇمىستىڭ زاڭدى جالعاسى، جاڭا كەزەڭى. مينتيمەر شايميەۆ بولاشاقتىڭ قامى ءۇشىن، بۇل ءىستىڭ اسا كەرەك ەكەنىن باسا ايتتى.

«قازاقستان پرەزيدەنتى بەلگىلەپ بەرگەن بەس دامۋ باعىتىنىڭ ءاربىر تۇسى تەرەڭ ويلاستىرىلعان. بۇل شىن مانىسىندە وتە زور، امبيتسيالى مىندەت. الايدا، دامۋدىڭ جاڭا دەڭگەيىنە كوتەرىلۋ ءۇشىن وسىنداي تىڭ ماقسات قويىپ، حالىقتى سەرپىلتۋ كەرەك. جاڭا رەفورمالاردىڭ ىسكە اساتىنىنا ەش كۇمان جوق. ول حالىقتىڭ ءال- اۋقاتىن ارتتىرىپ، ءومىر ءسۇرۋ ساپاسىن جاقسارتادى. مەن اۋمالى- توكپەلى زاماندا، ەلدىڭ الدىنا بيىك ماقسات قويىپ، سونى ىسكە اسىرۋعا ەرىك- جىگەرى جەتەتىن قازاقستان پرەزيدەنتىنىڭ قايراتكەرلىگىنە تاڭ قالامىن».

سونداي- اق تاتارستاننىڭ تۇڭعىش پرەزيدەنتى، ءبىزدىڭ ەلگە جاساعان ساپارلارىن ەرەكشە تەبىرەنە ەسكە الدى. ءسوز سوڭىندا، ءتۇرلى ۇلت پەن ۇلىستى ۇيىستىرىپ، ۇلى ىستەرگە ۇمتىلعان كيەلى مەكەن قازاقستان ماڭگىلىك ەلگە اينالادى دەگەن زور سەنىمىن ءبىلدىردى.