مەملەكەت باسشىسىنا استانا قالاسىنىڭ دامۋى جونىندە باياندالدى

استانا. قازاقپارات - ق ر پرەزيدەنتى نۇرسۇلتان نازاربايەۆ «استاناباس جوسپار» عىلىمي زەرتتەۋ جوبالاۋ ينستيتۋتى» ج ش س- دە بولدى، دەپ حابارلادى اقوردانىڭ باسپا ءسوز قىزمەتى.

 مەملەكەت باسشىسىنا استانانىڭ 2030 -جىلعا دەيىنگى باس جوسپارىنا تۇزەتۋ ەنگىزۋ، استانالىق اگلومەراتسيانى قالىپتاستىرۋ جوباسى باياندالدى، سونداي-اق ەلوردانىڭ جاڭا كولىك جۇيەسىن قۇرۋ بارىسى تانىستىردى.

سونىمەن بىرگە، قازاقستان پرەزيدەنتىنە ورىنبور كوشەسىن، جاڭا تەمىرجول ۆوكزالى اۋدانىن سالۋ تۇجىرىمداماسى، نۇرجول بۋلۆارىنىڭ ەكىنشى كەزەگى جوباسى تۋرالى باياندالدى. سونداي- اق نۇرسۇلتان نازاربايەۆقا ەلدوردادا قۇرىلىسى جوسپارلانىپ وتىرعان ءبىرقاتار عيماراتتاردىڭ جوبالارى كورسەتىلدى.

 ق ر پرەزيدەنتى ب ا ق-قا ارنالعان بريفينگتە اتاپ وتكەنىندەي، استانادا قۇرىلىس جۇرگىزۋ مەن اباتتاندىرۋ بويىنشا جۇمىستار جالعاساتىن بولادى.

«ءبىز قانداي ماسەلەلەر بار ەكەنىن بىلەمىز. سونىڭ ىشىندە اۆتوتۇراق ورىندارىنىڭ جەتىسپەۋشىلىگى دە بار، ول ماسەلە مىندەتتى تۇردە شەشىلەدى. جاقىندا جاۋعان جاڭبىر كارىز جۇيەسىندە قيىندىقتار بار ەكەنىن كورسەتتى، ونى دا جەتىلدىرۋ قاجەت. سونىمەن بىرگە بالاباقشالار مەن مەكتەپتەر سالۋ ماسەلەسىنە دە كوڭىل اۋدارۋ كەرەك. قالانىڭ ودان ءارى دامۋ پەرسپەكتيۆاسى ەكسپو-2017 اۋماعىن، ونىڭ اينالاسىنداعى كوشەلەردى سالۋدى، سۋلى- جاسىل بۋلۆاردى اباتتاندىرۋدى، جاڭا ساياباقتار، سونىڭ ىشىندە اۋماعى 100 گەكتار بولاتىن بوتانيكالىق باق سالۋدى قامتيدى. بۇل ەلىمىزدىڭ قاق ورتاسىندا جاڭا مەگاپوليس قۇرۋعا مۇمكىندىك بەرىپ، بارشا قازاقستاندىقتاردىڭ يگىلىگىنە قىزمەت ەتەتىن بولادى»، - دەدى مەملەكەت باسشىسى.