قازاقستان مەن گەرمانياداعى نەمىستەر حالىقارالىق كونفەرەنسيا وتكىزۋدى جوسپارلاۋدا
بۇل تۋرالى بۇگىن باسپا ءسوز ءماسليحاتىندا قازاقستان حالقى اسسامبلەياسى كەڭەسىنىڭ مۇشەسى، قازاقستان نەمىستەرى قاۋىمداستىعىنىڭ باسشىسى الەكساندر دەدەرەر ءمالىم ەتتى.
«ءبىز قازاقستاندا جانە گەرمانيادا ءتۇرلى قۇرىلىمدارمەن بىردەي قارىم-قاتىناس جاساپ تۇرامىز. بيىل قازان ايىندا ءبىز «قازاقستان نەمىستەرى - استانا مەن بەرلين اراسىنداعى كوپىر» اتتى حالىقارالىق كونفەرەنسيا ۇيىمداستىرۋدى جوسپارلاۋدامىز. بۇل كونفەرەنسيا وسى تاقىرىپتى جان-جاقتى اشۋعا، ونى تەرەڭ مانمەن تولتىرۋعا باعىتتالعان. ونىڭ قورىتىندىسى نەگىزىندە ءوزىمىزدىڭ تۇجىرىمدامامىزدى جاساقتاپ، جۇزەگە اسىراتىن بولامىز»، - دەپ اتاپ ءوتتى بىرلەستىك باسشىسى.
ونىڭ سوزىنە قاراعاندا، ءبىزدىڭ و باستا گەرمانياعا كوشكەن جەرلەستەر قازاقستان اتىن ايگىلەۋگە، ءبىزدىڭ ەلىمىزدى تانىستىرۋدا ۇلكەن ۇلەس قوسىپ كەلەدى.
«وسىنىڭ ارقاسىندا گەرمانيالىقتاردىڭ باسىم بولىگى قازاقستاندى جاقسى بىلەدى، ءتىپتى كورشى مەملەكەتتەي جاقىن كورەدى»، - دەيدى ا. دەدەرەر.
اۆتور: جاسۇلان جولدىبايەۆ
