قازاق ەلى تۇركى الەمىنىڭ ماقتانىشى سۇلەيمەن دەميرەلدىڭ ومىردەن وزعانىنا قايعىرىپ، كوڭىل ايتادى - ن. نازاربايەۆ
قازاقستان پرەزيدەنتىنىڭ كوڭىل ايتۋ جەدەلحاتىندا تۇرىك حالقىنىڭ عانا ەمەس، بارشا تۇركى الەمىنىڭ ماقتانىشى بولعان، دۇنيەجۇزىلىك دەڭگەيدە كەڭىنەن تانىمال ساياسي جانە مەملەكەت قايراتكەرىنىڭ ومىردەن وزعانى تۋرالى حاباردى زور كۇيزەلىسپەن قابىلداعانى اتاپ وتىلگەن.
«مەن سۇلەيمەن دەميرەلدى ادال ءارى سەنىمدى دوس رەتىندە قۇرمەت تۇتتىم. ءبىز ءجيى كەزدەسىپ، پىكىر الماسىپ وتىردىق، كوپتەگەن يگى باستامالارعا جول اشتىق. قازاقستان حالقى ونى پاراساتتى باسشى، كەمەڭگەر كوسەم، قازاقستان مەن تۇركيا اراسىنداعى باۋىرلاستىق قارىم- قاتىناستارعا زور ەڭبەك سىڭىرگەن تاريحي قايراتكەرلەر قاتارىنداعى كورنەكتى تۇلعا رەتىندە ءاردايىم ەستە ساقتايدى»، - دەلىنگەن جەدەلحاتتا.
نۇرسۇلتان نازاربايەۆ بارشا قازاقستاندىقتاردىڭ جانە جەكە ءوزىنىڭ اتىنان ر. ەردوعانعا جانە بۇكىل تۇركيا حالقىنا شىن نيەتپەن كوڭىل ايتتى.
