جەتىسايدا جاڭا مەشىت اشىلدى - فوتو

استانا. قازاقپارات - وڭتۇستىك قازاقستان وبلىسىنىڭ جەتىساي قالاسىندا ءسانى مەن ساۋلەتى جاراسقان «نۇعمان» اتىنداعى ءزاۋلىم مەشىتتىڭ اشىلۋ سالتاناتى بولىپ ءوتتى.

قۇلشىلىق ورداسىنىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلى، «نۇر وتان» ح د پ- نىڭ ءتوراعا ورىنباسارى باۋىرجان بايبەك، ساياساتكەر ءاليحان بايمەنوۆ، وڭتۇستىك قازاقستان وبلىسىنىڭ اكىمى اسقار مىرزاحمەتوۆ، ماقتارال اۋدانى اكىمى جامانتاي بەيسەنبايەۆ ت. ب. ءبىرقاتار زيالى قاۋىم وكىلدەرى قاتىستى، دەپ حابارلانعان قازاقستان مۇسىلماندارى ءدىني باسقارماسىنىڭ سايتىندا.

قازىر ەلىمىزدە 2500 گە جۋىق يماندىلىق ءۇيى بار بولاتىن بولسا، بۇل جاڭا نىسان وسى وڭىردەگى 786- مەشىت بولىپ اشىلىپ وتىر.

سالتاناتتى جيىن ق م د ب- نىڭ ءتوراعاسى، نايب ءمۇفتي، «ازىرەت سۇلتان» مەشىتىنىڭ باس يمامى سەرىكباي قاجى وراز ساتىبالدى ۇلىنىڭ قاسيەتتى قۇران كارىمدى ءتيلاۋات ەتۋىمەن باستالدى. بۇدان سوڭ ءسوز العان قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلى بارشا جيىلعانداردى قۇتتىقتاپ، ءوز لەبىزىن ءبىلدىردى.

«پايعامبارىمىز (س. ع. س) اللا ءۇيىن تۇرعىزعان ادام ءۇشىن ءجانناتتا ساراي سالىناتىنىن وسيەت ەتىپ، سۇيىنشىلەگەن. ەندەشە، جاڭا مەشىت يماندىلىقتىڭ تەمىرقازىعىنا اينالسىن. قۇرمەتتى باۋىرلار، بىزدەر قوي ۇستىنە بوزتورعاي جۇمىرتقالاعان بەيبىت، تىنىش زاماندا ءومىر ءسۇرىپ وتىرمىز. قۇلشىلىق جاساۋعا بارلىق ازامات قۇقىلى. قۇدايعا قۇل، ادامعا ۇل بولۋدى، يماندىلىقتى تۋ ەتۋدى ماقسات تۇتۋىمىز كەرەك»، - دەگەن باس ءمۇفتي مەشىت كىتاپحاناسىنا ەڭ ۇلكەن سىيلىق - قاسيەتتى قۇران كارىمدى تارتۋ ەتتى.

وسىدان سوڭ وبلىس اكىمى اسقار مىرزاحمەتوۆ قۇتتىقتاۋ ءسوز الىپ، مەشىت سالدىرعان باحاريددين ابلازيموۆقا ماقتارال اۋدانىنىڭ «قۇرمەتتى ازاماتى» اتاعىن تابىس ەتتى. مۇنىمەن قاتار، التىن قۇرساقتى اناسى جامال اپانى «التىن انا» مەدالىمەن ماراپاتتادى.

جاڭا قۇلشىلىق ءۇيىنىڭ اتاۋى - يمام اعزام ءابۋ حانيفانىڭ قۇرمەتىنە «نۇعمان» دەلىنگەن. جەر كولەمى 5 گەكتار جەردى قۇرايدى. جالپى، قۇلشىلىق ۇيىندە ءبىر مەزەتتە 1 مىڭ ادام ناماز وقي الادى. توعىز جولدىڭ تورابىندا ورنالاسقان مەشىتتىڭ 4 مۇناراسى بار. اللا ءۇيىنىڭ قۇرىلىس ساۋلەتى ۇلتتىق ناقىشپەن تۇرعىزىلعان. مەشىتتىڭ كونفەرەنتسيا زالى، كىتاپحاناسى، ەكى ءدارىسحاناسى، ءبىر ۇلكەن ايەلدەر زالى، نەكە جانە يمامدار بولمەسى بار.

سونىمەن قاتار مىڭ كولىككە ارنالعان اۆتوتۇراققا ورىن بولىنگەن. مۇنىمەن قاتار، مەشىت اۋماعىندا 500 كىسىگە ارنالعان اسحاناسى دا قاراستىرىلعان.