نازاربايەۆ ۋنيۆەرسيتەتى تولىققاندى ءبىلىم بەرۋ ورتالىعىنا اينالدى - مەملەكەت باسشىسى
«بۇل ەلىمىزدەگى ءبىلىم بەرۋ جۇيەسىنىڭ ەڭ ايشىقتى كۇنى بولىپ سانالادى. سەبەبى الەمدىك دەڭگەيدەگى تۇڭعىش ۋنيۆەرسيتەت ستۋدەنتتەرىنىڭ العاشقى لەگىن ءبىز ۇلكەن الەمگە شىعارىپ وتىرمىز.
ءبىز ۋنيۆەرسيتەتتى قۇرعاندا بۇل جەردە الەمدىك دەڭگەيدەگى ماماندار دايىنداۋدى جولعا قويۋدى ماقسات ەتكەنبىز. بۇگىن سول ماقسات تولىق ورىندالدى»، - دەدى ەلباسى.
مەملەكەت باسشىسى ۋنيۆەرسيتەت تۇلەكتەرىنىڭ ءبىلىمى الەمنىڭ ەڭ جوعارعى وقۋ ورىندارىنىڭ تالاپتارىمەن تولىعا تۇسكەنىن باسا ايتتى.
«بۇل مەنىڭ تىكەلەي باستامام مەن قامقورلىعىمنىڭ ناتيجەسىندە جۇزەگە اسقانىن بىلەسىزدەر. ۇستازدار قاۋىمىنىڭ قاجىرلى ەڭبەگى مەن تاجىريبەسىنىڭ ارقاسىندا مۇمكىن بولدى. جاس ورەندەرىمىزدىڭ عىلىم كوكجيەگىنە دەگەن قۇشتارلىعى مەن ىزدەنىسى ارقىلى ورىن الدى. وسىلاي نازاربايەۆ ۋنيۆەرسيەتى تولىققاندى ءبىلىم بەرۋ ورتالىعىنا اينالدى»، - دەدى ق ر پرەزيدەنتى.
بۇگىن مەملەكەت باسشىسى نازاربايەۆ ۋنيۆەرسيتەتىنىڭ ۇزدىك تۇلەكتەرىنە ديپلوم تابىستادى.
ق ر پرەزيدەنتى قولىنان ۇزدىك ديپلوم العاندار قاتارىندا ءاليا جاقسيەۆا، ايسۇلۋ ايتبەكوۆا، انار قاسىموۆا، ادىلەت وتەمىسوۆ، تەمىرلان سەيداحمەتوۆ، جانار شوقايەۆا، ايجان تەمىربايەۆا، التىناي دۇيسەنبەكوۆا، ۆالەنتينا ۆينوكۋروۆا بولدى.
ايتا كەتەيىك، 2010 - جىلى قازاقستان پرەزيدەنتىنىڭ باستاماسىمەن قۇرىلعان بۇل وقۋ ورنى وتاندىق ءبىلىم بەرۋدىڭ ۇزدىك ۇلگىسى بولىپ تابىلادى. بيىل ۋنيۆەرسيتەتتى 446 ستۋدەنت ءتامامداپ وتىر. تاراتىلعان مالىمەتتەرگە قاراعاندا، جالپى وقۋ ورنى اشىلعاننان بەرى جەتى مەكتەپتەگى ستۋدەنتتەر سانى 2800 گە دەيىن جەتتى. جىل سايىن 500 ادام وقۋ گرانتىنا يە بولۋدا. ماگيسترانتتار مەن دوكتورانتتار دا مەملەكەتتىك ءبىلىم بەرۋ تاپسىرىسى بويىنشا ءبىلىم الادى.
اۆتور: مارلان جيەمباي
