قازاقستاندا ەڭبەككە قابىلەتتى جاستاعى تۇرعىندار سانىنىڭ ءوسىمى تومەندەيدى
«رەسپۋبليكا تۇرعىندارىنىڭ بولجالدى سانىنا سايكەس 2018-جىلعا دەيىنگى كەزەڭدە ەڭبەككە قابىلەتتى جاستاعى تۇرعىندار سانىنىڭ ءوسىمى الدىڭعى جىلدارعا قاراعاندا ەداۋىر تومەن بولادى»، دەلىنگەن حابارلامادا.
باستى سەبەپ ت م د ەلدەرىندە، ونىڭ ىشىندە قازاقستاندا 1990-جىلدارى بولعان دەموگرافيالىق قۇلدىراۋ بولىپ وتىر. ول كەزدە ەكونوميكادا ورىن العان داعدارىستىق كورىنىستەر 21- عاسىردىڭ باسىنا دەيىن تۋۋ كورسەتكىشتەرىنە كەرى اسەرىن تيگىزدى.
ساراپشىلار سوڭعى جىلدارى ەڭبەككە قابىلەتتى جاستاعى تۇرعىندار سانىنىڭ ءوسىمى بىرتىندەپ تومەندەپ كەلە جاتقانىن ايتادى. مىسالى، اعىمداعى جىلى بۇل ءوسىم 0,2 پايىزدى قۇراسا، كەلەسى جىلى- 0,14 پايىزدى، 2017-جىلى - 0,08 پايىزدى، ال 2018-جىلى ەڭ تومەن كورسەتكىش - 0,03 پايىزدى قۇرايدى.
اتالعان ۇردىستەردىڭ نەگىزگى سەبەپتەرىنىڭ ءبىرى 16-24 جاس ارالىعىنداعى جاستار سانىنىڭ اعىمداعى جىلعى 2,4 ميلليوننان 2018-2021-جىلدارى 2,1 ميلليونعا دەيىن ازايۋى بولىپ تابىلادى. بولجامعا ساي، جاستاردىڭ سانى بويىنشا 2015-جىلعى دەڭگەيگە تەك 2025-جىلى جەتەدى.
سونىمەن قاتار زەينەتكەرلىك جاستاعى تۇرعىندار سانى بيىل 1,6 ميلليون بولسا، 2018-جىلى 2.1 ميلليونعا جەتەدى.
ساراپشىلاردىڭ بولجامىنشا، بولاشاقتا زەينەتكەرلىك جاستاعى ازاماتتار سانى (زەينەتكەرلىككە شىعاتىن قازىرگى جاستى ەسەپكە العاندا) ارتا ءتۇسىپ، قازاقستان تۇرعىندارىنىڭ جيىنتىق سانى قازىرگى 10,6 پايىزدان 2030-جىلى 14 پايىزدى جانە 2050-جىلى 15,6 پايىزعا جەتەدى.
ياعني، الداعى جىلدارى رەسپۋبليكا ەكونوميكاسىنىڭ دامۋىن ەسەپكە الا وتىرىپ، جۇمىس بەرۋشىلەر جاڭا جۇمىسكەرلەردى جالداۋدا پروبلەماعا تاپ بولۋى مۇمكىن. ەكىنشى جاعىنان، جۇمىسسىزدىق دەڭگەيى ءارى قاراي تومەندەۋى ءتيىس.
