بۇگىن قازاقستان مەن تۇركيا اياقدوپشىلارى شەبەرلىك بايقاسادى
ويىن الماتىنىڭ ورتالىق ستاديونىندا وتەدى. «ا» توبىندا سىنعا ءتۇسىپ جاتقان قوس قۇرامانىڭ تۋرنيرلىك جاعدايى ءماز ەمەس.
تۇرىكتەر 5 ويىننان كەيىن نەبارى 5 ۇپاي ەنشىلەپ، توپتاعى ءتورتىنشى ورىنعا تۇراقتاسا، قازاقستان ازىرگە جالعىز ۇپايىمەن كوش سوڭىندا كەلەدى. توپتاعى مىقتىلاردىڭ ءبىرى دەپ تانىلعان تۇرىكتەر: «بۇگىنگى ويىندا بارىمىزدى سالامىز»، - دەپ وتىر. الماتىعا اكەلگەن قۇرامى دا اردا تۇران، حاكان شالحانوعلى سەكىلدى كىل مىقتىلاردان جاساقتالعان.
فاتيح تەرىم ، تۇركيا قۇراماسىنىڭ باس باپكەرى - ءبىز تەك جەڭىس ءۇشىن كەلدىك. الايدا وعان جەتۋ وڭاي بولمايدى. ويتكەنى ءبىزدىڭ ويىنشىلار ماۋسىمدى ەندى اياقتاعاندىقتان، ءالى تىنىعىپ ۇلگەرمەدى. سوعان قاراماستان بۇگىنگى ويىندا ءبىز بارىمىزدى سالامىز. ەۋروعا ىرىكتەلگىمىز كەلسە، مىندەتتى تۇردە جەڭىس كەرەك.
www.khabar.kz
