17:06, 11 - ماۋسىم 2015 | GMT +5
ەلباسى «رۋحاني الەم مەن كەلىسىمدى دامىتۋعا جانە نىعايتۋعا قوسقان ۇلەسى ءۇشىن» سىيلىعىن تاعايىنداۋدى ۇسىندى
استانا. قازاقپارات - بەيبىتشىلىك پەن كەلىسىم سارايىندا ءوتىپ جاتقان الەمدىك جانە ءداستۇرلى دىندەر ليدەرلەرىنىڭ 5- سەزىنىڭ 2- جالپى وتىرىسىندا ەلباسى نۇرسۇلتان نازاربايەۆ «رۋحاني الەم مەن كەلىسىمدى دامىتۋعا جانە نىعايتۋعا قوسقان ۇلەسى ءۇشىن» سىيلىعىن تاعايىنداۋدى ۇسىندى.
ەلباسى ءوز سوزىندە دىندەر مەن ەتنوستار اراسىنداعى رۋحاني، ءتوزىمدى قارىم- قاتىناستى قالىپتاستىرىپ، ولاردىڭ ىنتىماعى مەن بىرلىگىنىڭ ۇشتاسۋىنا ەرەن ەڭبەك سىڭىرگەن تۇلعالارعا قۇرمەت كورسەتۋ ماڭىزدى ەكەندىگىن اتاپ ءوتتى.
«رۋحاني الەم مەن كەلىسىمدى دامىتۋعا جانە نىعايتۋعا قوسقان ۇلەسى ءۇشىن سىيلىعىن، سونىمەن بىرگە وسى جەردە باس قوساتىن كورنەكتى ادامدار ءۇشىن قۇرمەت بەلگىسىن بەكىتۋدى ۇسىنامىن»، - دەدى ق ر پرەزيدەنتى.
مەملەكەت باسشىسى اتالعان سىيلىقتاردى ءدىني ليدەردەر كەڭەسى شەشىمىمەن تاعايىنداپ، سەزدىڭ جالپى وتىرىسىندا تابىس ەتۋگە بولاتىندىعىن ايتتى.
«ەگەر سىزدەردىڭ تاراپتارىڭىزدان قارسىلىق بولماسا، مەن سەزد حاتشىلىعىنا وسى ەكى ماسەلەمەن اينالىسۋدى تاپسىرامىن»، - دەدى ن. نازاربايەۆ.
اۆتور: مارلان جيەمباي
