ق ر پرەزيدەنتى يوردانيا كورولىنىڭ تاياۋ شىعىستاعى تۇراقتىلىقتى قامتاماسىز ەتۋدەگى ماڭىزدى ءرولىن اتاپ ءوتتى
دەپ حابارلايدى اقوردانىڭ باسپا ءسوز قىزمەتىنەن.
نۇرسۇلتان نازاربايەۆ پەن II ابداللا ەكىجاقتى جانە وڭىرلىك ىنتىماقتاستىق ماسەلەلەرىن قاراستىردى، سونداي- اق حالىقارالىق كۇن تارتىبىندەگى وزەكتى جايتتار تۋرالى پىكىر الماستى.
سونىمەن قاتار استانادا ءوتىپ جاتقان الەمدىك جانە ءداستۇرلى دىندەر ليدەرلەرى سەزىنىڭ جۇمىسى تالقىلاندى.
نۇرسۇلتان نازاربايەۆ يوردانيانىڭ قازاقستانعا جاقىن ەل ەكەنىنە نازار اۋداردى.
- ءسىزدىڭ الەمدىك جانە ءداستۇرلى دىندەر ليدەرلەرى سيەزىنە قاتىسۋ ءۇشىن ءبىزدىڭ ەلىمىزگە كەلۋىڭىز زور مانگە يە. ءبىز سىزبەن ءاردايىم ءوزارا سەنىمدى قارىم- قاتىناستا بولدىق. قازاقستان ءسىزدىڭ ەلىڭىزگە ۇلكەن قۇرمەتپەن قارايدى. ءسىزدىڭ يوردانيا ورنالاسقان وڭىردەگى تۇراقتىلىقتى قامتاماسىز ەتۋدە ماڭىزدى ءرول اتقارىپ وتىرعانىڭىزدى اتاپ وتكىم كەلەدى. سوندىقتان ءبىز ءسىزدى ءاردايىم قولداۋعا ءازىرمىز، - دەدى مەملەكەت باسشىسى.
II ابداللا ەكىجاقتى بايلانىستاردى نىعايتۋدىڭ ماڭىزدىلىعىن ايتا كەلىپ، قازاقستانعا شاقىرعانى ءۇشىن نۇرسۇلتان نازاربايەۆقا العىس ايتتى.
- وزىڭىزبەن كەزدەسىپ، ورتاق كۇش- جىگەرىمىز ارقىلى الەمنىڭ بۇدان دا جايلى ءارى تىنىش بولۋىنا قالاي ىقپال ەتە الاتىندىعىمىز تۋرالى سىزدەن كەڭەس الۋ مەنى ءاردايىم جىلى اسەرگە بولەيدى. مەن كوپ جىلدان بەرى وڭىردەگى بىتىمگەرشىلىك، حالىقتار مەن دىندەردى جاقىنداستىرۋ جولىنداعى ءسىزدىڭ قىزمەتىڭىزگە ءتانتى بولىپ كەلەمىن، - دەدى يوردانيا كورولى.
