ن. نازاربايەۆ سيرياداعى، يەمەندەگى، ليۆياداعى قاقتىعىستاردى شەشۋدىڭ ناقتى جولدارىن ۇسىنىپ وتىر - م. اراكي
بۇل تۋرالى بۇگىن استانادا الەمدىك جانە ءداستۇرلى دىندەر كوشباسشىلارىنىڭ 5- سەزىندە دۇنيەجۇزىلىك يسلام مازحابتارىن جاقىنداستىرۋ اسسامبلەياسىنىڭ باس حاتشىسى موحسەن مۇحاممادي اراكي ءمالىم ەتتى.
«بۇل قاقتىعىستار كوپتەگەن ەلدەردىڭ الەۋەتىن سارپ ەتتى. ءبىراق ادامدار وعان قارسى تۇرا الۋى ءتيىس. سيرياداعى، يەمەندەگى، يراكتاعى قاقتىعىستاردى توقتاتۋعا قاۋقارىمىز جوق پا؟ ! وعان ءالىمىز دە، الەۋەتىمىز دە جەتەدى. وعان ىقپال ەتە الاتىندار، وسى ماسەلەلەردىڭ شەشىلۋىن قۇپتاپ كەلە جاتقانداردىڭ بارلىعى وسىعان كۇش سالۋلارى ءتيىس. ءبىز قازاقستان پرەزيدەنتىنىڭ وسى باعىتتا ناقتى ىستەر ۇسىنىپ وتىرعاندىعىن كورىپ وتىرمىز. ول سيرياداعى، يەمەندەگى، ليۆياداعى جانە وزگە دە ەلدەردەگى قاقتىعىستاردى شەشۋدىڭ ناقتى جولدارىن الدىمىزعا سالىپ وتىر» ، - دەدى ول.
ونىڭ سوزىنە قاراعاندا، سەز بارىسىندا الەم ەلدەرىنىڭ وكىلدەرى وسى ماسەلەلەردى تىيۋعا باعىتتالعان ءبىرقاتار شەشىمدەردى جاساۋى كەرەك. سونىمەن قاتار م. اراكي ەلباسىدان سيرياداعى قاقتىعىستىڭ اياقتالۋىنا قوسىپ جاتقان ۇلەسىن بۇدان ءارى دە جالعاستىرۋىن سۇرادى.
«ساياساتكەرلەر، اسىرەسە، سيرياداعى جاعدايدى تۇراقتاندىرۋعا ۇلكەن ءمان بەرۋى قاجەت. سەبەبى وندا قازا بولىپ جاتقانداردىڭ سانى وتە كوپ. ليۆيادا، يراكتا، يەمەندە دە سونداي جاعدايلار ورىن الۋدا. قانتوگىستى توقتاتۋىمىز كەرەك. وسى ايماقتاردا بەيبىتشىلىك پەن كەلىسىمدى ورناتۋىمىز شارت. مەن تاعى ءبىر رەت شىن جۇرەكتەن قازاقستان پرەزيدەنتى نۇرسۇلتان نازاربايەۆقا العىسىمدى جەتكىزگىم كەلەدى. وسى باعىتتا ءتيىستى قادامدار جاساۋىن جالعاستىرۋدى سۇرايمىن. بۇل سەزد ءبىزدىڭ بەيبىتشىلىكتى ورناتۋعا ارنالعان ناقتى شارالارىمىزدى جاريالاۋعا ۇلكەن مۇمكىندىكتەر بەرىپ وتىر»، - دەپ ءتۇيدى ءسوزىن اسسامبلەيا باسشىسى.
اۆتور: جاسۇلان جولدىبايەۆ
