قوس قىزدى قۇتقارىپ قالعان ن. تيۋكيننىڭ ەرلىگىن قوعام قالاي قابىلدادى؟
سودان بەرى جاس بالانىڭ كوزسىز ەرلىگىن قازاقستاندىقتار الەۋمەتتىك جەلىلەردە تامسانا جازىپ، كۇن سايىن دارىپتەۋدى وزدەرىنە پارىز ساناعانداي.
ينتەرنەت قولدانۋشى قۋاندىق ءمادىر: «نيكيتا ناعىز ازامات ەكەن! ىلايىم جاراتۋشى قولداپ ءجۇرسىن!» ، دەپ اقجارما تىلەگىن ورتاعا سالسا، الەۋمەتتىك جەلىنى قولدانۋشىلاردىڭ دەنى نيكيتا بالا بولسا دا بۇل ەرلىگى ارقىلى قوعامعا جاۋاپكەرشىلىك دەگەن ادامنىڭ اسىل قاسيەتىن ەسكە سالدى دەگەن سىڭايدا جازدى.
مىسالى، تەمىر ەسىمدى ينتەرنەت قولدانۋشى:
«مۇنداي بالالارعا قولداۋ كورسەتۋ كەرەك. ءتىپتى، جەرگىلىكتى توتەنشە جاعدايلار دەپارتامەنتى بالانى قىزمەتكە السا، تالايعا ۇلگى بولار ەدى. ويتكەنى، قوعام الدىندا جاۋاپكەرشىلىك تانىتقاندار، دالادا قالماي، ولارعا ءارقاشان جۇمىس تابىلاتىنىن جاستار ءبىلىپ، تۇيسىنەر ەدى» ، دەپ جازدى.
سولاردىڭ اراسىندا نيكيتاعا ءوز اتىنان سىياقى تاعايىنداعاندارى دا بولدى. ناقتىراق ايتقاندا، بۇگىن قازاقستاننىڭ ماكروەكونوميكالىق زەرتتەۋلەر ورتالىعىنىڭ ديرەكتورى ولجاس قۇدايبەرگەنوۆ 7 سىنىپ وقۋشىسىنىڭ ەرلىگىنە باس ءيىپ، ونىڭ اناسىنىڭ ەسەپ شوتىنا 200 مىڭ تەڭگە اۋدارىپ جىبەردى. بۇل تۋرالى ول فەيسبۋكتەگى جەكە پاراقشاسىندا حابارلادى.
«مەن بۇل اقشانى ەكى سىنىپتاسىن (ولار 7- سىنىپتا وقيدى) ولىمنەن قۇتقارعان نيكيتا تيۋكينگە اۋدارۋعا ۋادە بەرگەن ەدىم. اقشا نيكيتانىڭ اناسى ولگا تيۋكينانىڭ شوتىنا جىبەرىلدى. اناسى باسىندا سەنگەن جوق. بۇل اقشا نيكيتانىڭ قاجەتىنە جارايدى دەپ سەنەمىن» ، - دەپ جازدى ولجاس قۇدايبەرگەنوۆ الەۋمەتتىك جەلىدەگى جەكە پاراقشاسىندا.
ەسكە سالا كەتەيىك، جەتىنشى سىنىپتى ويداعىداي بىتىرگەن ن. تيۋكين 24 - مامىر كۇنى دوستارىمەن بىرگە دۇكەنگە بارادى. جول- جونەكەي كەزدەستىرگەن ەكى قىزدىڭ ءبىرى ءوزىنىڭ سىنىپتاسى ەدى. دۇكەن جانىندا دوستارى قالىپ قويادى دا، نيكيتا قىزدارمەن اڭگىمەلەسىپ، سۋعا شومىلۋدى ءجون كورەدى. وزەن ورتاسىنا دەيىن ءجۇزىپ بارعان ول ارتىنا قاراسا، قىزداردىڭ ءبىرى سۋعا شاشالىپ، باتىپ بارا جاتقان. سول بويدا كومەككە ۇمتىلىپ، ونى جاعاعا شىعارادى. ەندى ەكىنشى قىز ايقايلاپ جاردەمگە شاقىرادى. وعان جەتكەن كەزدە قىز كورىنبەي كەتكەن ەدى. بالا بىرنەشە رەت سۇڭگىگەننەن كەيىن عانا سۋ استىندا ەشقانداي قوزعالىسسىز جاتقان قىزدى تاۋىپ، 20 مەتر جەرگە دەيىن سۇيرەپ، جاعاعا تارتىپ شىعارادى. سول جەردە كەۋدە تۇسىنان جاساندى تىنىس الدىرۋ ءادىسىن جاسايدى. سودان كەيىن عانا اۋزىنان سۋ شىققان قىز دەمالىپ كەتتى.
«قىزدارىمىزدى اجال اۋزىنان اراشالاپ قالعان نيكيتاعا انالىق العىسىمىز شەكسىز. وسىنداي ۇل تاربيەلەپ وتىرعان اتا- اناسىنا، مەكتەپ ۇجىمىنا ريزامىز» ، - دەيدى قىزداردىڭ اناسى ناتاليا شەپەليەۆا مەن ولەسيا لوگۆينەنكو.
