قازاقستاندا نەكە جاسىن تومەندەتۋ كەرەك پە؟
جەتكىنشەكتەردىڭ بوسانىپ جاتۋى دا از كەزدەسپەيدى. سول سەبەپتى، جاس انالارعا زاڭدى ايەل اتانۋ مۇمكىندىگىن بەرۋ ءۇشىن نەكەنىڭ جاسىن تومەندەتۋ قاجەت دەگەن پىكىر ايتىلۋدا.
بۇل تۋرالى «كاراۆان» گازەتىنە سىلتەمە جاساپ NUR. KZ حابارلادى.
نەكە جاسىن تومەندەتۋ ۇسىنىسى بۇعان دەيىن پارلامەنت دەڭگەيىندە دە تالقىلانىپ ۇلگەرگەن. الايدا بۇل ۇسىنىس ماسەلەنى شەشە الادى ما؟
قازاقستاندا نەكە جاسىن تومەندەتۋدى قولدامايتىندار دا بارشىلىق. باستى قورقىنىش - بۇل قادام كۇشتەپ ەرتە نەكە قيدىرتۋ جاعدايلارىن كوبەيتىپ جىبەرۋى مۇمكىن. قوعامدىق قاۋىمداستىق ساراپشىلارى بۇل ماسەلەنىڭ ونسىز دا ۋشىعىپ تۇرعانىن ايتۋدا.
جىل سايىن قازاقستاندا كامەلەتكە تولماعاندار اراسىندا 3000 نەكە تىركەلەدى. مۇنداي نەكە اۋىلداردا ءجيى كورىنىس تابادى. ايماقتار بويىنشا العاشقى ورىندى الماتى يەلەندى. ودان كەيىنگى ورىندارعا اتىراۋ، الماتى جانە قاراعاندى وبلىستارى جايعاسقان.
«ايەلدەردىڭ شىعارماشىلىق ىنتاسى» قوعامىنىڭ باسشىسى اسەل حايرۋللينانىڭ ايتۋىنشا، مۇنداي جاعدايدا ايەلدىڭ ەركىندىك قۇقىقتارى تاپتالىپ، فيزيكالىق، پسيحيكالىق زورلىققا تاپ بولادى. اسىرەسە ءبىلىم الۋ قۇقىعى بۇزىلادى. سەبەبى، جاستايىنان تۇرمىسقا شىققان جەتكىنشەك ءتىپتى مەكتەبىن بىتىرە الماي قالادى. اقىرى ماماندىعى، ءبىلىمى جوق بويجەتكەندەر ءوز قۇقىقتارىن قورعاۋ مۇمكىندىگىنەن دە ايىرىلىپ جاتادى.
كەي قۇقىق قورعاۋشىلار ەرتە نەكەگە جول بەرۋ قاۋىپتى ەكەنىن جاسىرمايدى. ولار، اسىرەسە جاسى كەلگەندەر وزىنە نەمەرە بولۋعا جارايتىن جەتكىنشەكتى ايەلى قىلۋىن زاڭدى دۇنيەگە اينالدىرۋ جاقسىلىققا اپارمايدى دەپ ەسەپتەيدى.
بالانىڭ بالالىق شاعى بولۋى كەرەك. ال ءبىز نەكەنىڭ جاسىن زاڭدى تۇردە تومەندەتكەننەن نە تابامىز؟
«مەن قۇقىق تۇرعىسىنان ايتا الامىن. بالانىڭ بالالىق شاعى بولۋى كەرەك. ال ءبىز نەكەنىڭ جاسىن زاڭدى تۇردە تومەندەتكەننەن نە تابامىز؟ نەگىزىنەن جاستايىنان تۇرمىسقا كۇشتەپ بەرىلەتىن قىزدار زارداپ شەگەدى. شىنى كەرەك، ولاردىڭ كوبىسىن قالتالى ەر كىسىلەرگە بەرىپ جاتادى. بۇل كىمگە ءتيىمدى ەكەنى بىردەن تۇسىنىكتى»، - دەيدى پارلامەنتاريزم قورىنىڭ پرەزيدەنتى زاۋرەش باتالوۆا.
ونىڭ ايتۋىنشا، ەرتە جۇكتىلىكپەن كۇرەسۋ ءۇشىن نەكە جاسىن تومەندەتىپ، زاڭدى وزگەرتۋدىڭ ەش قاجەتى جوق. تەك جەتكىنشەكتەرگە دۇرىس بالالىق شاق پەن جاقسى تاربيە بەرۋ كەرەك.
Nur.kz
