رەسەي ماماندارى كيىكتەردىڭ جاپپاي قىرىلۋ سەبەبىن ايتتى

استانا. قازاقپارات - رەسەيدىڭ اۋىل شارۋاشىلىعىن باقىلاۋ فەدەرالدىق قىزمەتى قازاقستاندا كيىكتەردىڭ پاستەرەللەز سەبەبىنەن جاپپاي قىرىلىپ جاتقانىن راستادى.

بۇل تۋرالى ۆەدومستۆونىڭ رەسمي سايتىندا جازىلعان.

ەسكە سالا كەتەيىك، كيىكتەر قازاقستاندا 2015 -جىلدىڭ مامىر ايىنىڭ باسىنان بەرى جاپپاي قىرىلىپ جاتىر.

«جانۋارلاردىڭ دەنساۋلىعىن قورعاۋ فەدەرالدىق ورتالىعىنا» قاراستى رەفەرەنتتىك زەرتحانا قىزمەتكەرلەرى قازاقستاننىڭ اقمولا، اقتوبە جانە قوستاناي وبلىستارىنداعى كيىكتەرگە 1-2 -ماۋسىم كۇندەرى ەەرتتەۋ جۇرگىزدى. «ورتالىق قىزمەتكەرلەرى جۇرگىزگەن زەرتتەۋ ناتيجەسىندە اۋسىل، وبا سياقتى اۋرۋلار جوققا شىعارىلدى. بارلىق سىنامالاردان ۆ ءتيپتى (گەمورراگيالىق سەپتيتسەميا قوزدىرعىشى) Pasteurella multocida انىقتالدى»، - دەلىنگەن ۆەدومستۆو سايتىندا.

ەسكە سالا كەتەيىك، كيىكتەر 11 -مامىردان باستاپ جاپپاي قىرىلا باستادى. ق ر ا ش م ورمان شارۋاشىلىعى جانە جانۋارلار دۇنيەسى كوميتەتىنىڭ قىزمەتكەرلەرى سول كۇنى قوستاناي وبلىسى امانگەلدى اۋدانى جولاباي اۋماعىندا بەلگىسىز سەبەپتەن مەرت بولعان شامامەن 100 كيىكتىڭ ۇشاسىن تاپتى.

ءبىر ايدىڭ ىشىندە ولاردىڭ سانى مىڭ ەسەدەن ارتتى. كيىكتەر قىرىلماي تۇرعاندا قازاقستاندا ولاردىڭ سانى 300 مىڭنان جوعارى بولعان.