ايەلگە قىرىق جان نە ءۇشىن كەرەك؟
اتا- بابامىز مۇرا ەتىپ قالدىرعان اتالى ءسوزدىڭ ەشبىرى تەككە ايتىلماعان. ايەلگە قىرىق جان نە ءۇشىن كەرەك؟ قىرىق جانى بولسا نەگە سونشا نازىك؟
ايەل بولىپ كۇن كەشۋ ءۇشىن. ايەل ادامعا ايەل بولىپ كۇن كەشۋدىڭ ءوزى ءبىر جاعىنان - باقىت، ءبىر جاعىنان - سالماقتا ءىس. ۇيتكەنى، قىرىق جاننىڭ دا ءوز سالماعى بار. ايەلدىڭ بولمىسىنا ساي تۇرمىستىڭ قاندايىنا بولسا دا ءتوزىۋ ءۇشىن كەرەك. ولاردىڭ فيزيكالىق جاعدايى ءالسىز بولعانىمەن، ىشكى جان- دۇنيەسى مەن جۇيكەسى مىقتى. ايەلدىڭ عۇمىرىن بويىنا ءسىڭىرىپ، ايەل اتىنا ساي بولۋ ءۇشىن دە قىرىق جان كەرەك.
ءوزىنىڭ قىرىق جانىمەن ەرىنىڭ جالعىز جانىنا قورعان بولۋ ءۇشىن. ەر ادامنىڭ جانىنىڭ تىنىشتىعى مەن جۇيكەسىنىڭ تىنىشتىعىنا جاۋاپ بەرىپ، وعان جايلىلىق ورناتۋ ءۇشىن دە قىرىق جان كەرەك. ونىڭ بارلىق مىنەزى مەن قىلىعىنا ءتوزىپ، كوڭىلىنەن شىعۋ دا كوپتىڭ قولىنان كەلە بەرمەيدى. ەرىنىڭ جاتسا - جاستىعى، وتىرسا - سۇيەۋى، تۇرسا - تىرەگى بولىپ رۋحاني جاقتان وعان كومەك بەرىپ، سونىمەن قاتار، ءوزىنىڭ ايەل زاتىنا ساي كوركەم مىنەزى مەن بولمىسىن ساقتاۋ ارقىلى وعان جاعىنۋ ءۇشىن ءتىپتى قىرىق جان دا از شىعار...
دۇنيەگە بالا اكەلىپ، ونى ءوسىرۋ ءۇشىن. جالعاسىپ جاتقان تىرشىلىكتىڭ قىزىعى دا، ءمانى دە - بالا ءوسىرىپ، ادام قىلۋ. ومىرگە بالا اكەلگەننەن باستاپ سول بالانىڭ ءومىرى مەن دەنساۋلىعىنا جاۋاپكەرشىلىكتى ءوز موينىنا الادى. بالا ءوسىپ، ءوز قولى اۋزىنا جەتكەنشە سونىڭ قامىن ويلايدى. مەنىڭشە، بۇل بەينەتكە قىرىق جان دا ازدىق ەتەدى.
تۇرمىس تاۋقىمەتىنە ءتوزىۋ ءۇشىن. كەز كەلگەننىڭ باعىنا باقىتتى عۇمىر ءناسىپ ەتىلمەگەن. سونداي باقىتتى ساتتەردىڭ كولەڭكەسى الىستاپ، باسىنا بۇلت تونگەن كەزدەردە تۇرمىستىڭ بار تاۋقىمەتىنە ءتوزىپ، كەز كەلگەن بولعان ىسكە بولاتتاي بەرىك بولۋ ءۇشىن دە ايەلدە كۇش- جىگەر جەتەدى. كەز كەلگەن قايعىعا قاسقايا قارسى تۇرىپ، بولماشىعا ءمۇجىلىپ قالماس ءۇشىن قىرىقتان دا كوپ جان كەرەك.
blogtime.kz
