قازاقستانعا وليمپيادا جولداماسىن سىيلاعان جاڭا جوبانىڭ ەكىنشى كەزەڭى باستالادى

استانا. قازاقپارات - بوكس دەسە ىشكەن اسىن جەرگە قوياتىن قازاق جانكۇيەرلەرى از ەمەس. سەبەبى، قانداي شارشى الاڭدا جۇدىرىقتاسسىن جەرلەستەرىمىز جەڭىس تۇعىرىنان تىس قالىپ كورگەن جوق.

وتكەن جىلى قازان ايىندا بوكستان AIBA تۇڭعىش رەت APB جوباسىنىڭ تۇساۋىن كەسكەن بولاتىن. بۇل الەمدىك باسەكەدەن قازاقستاندىق بىلعارى قولعاپ شەبەرلەرى دە تىس قالماي جارىس كورىگىن قىزدىرۋ مۇمكىندىگىنە يە بولدى. ايتالىق، جاڭا جوبانىڭ ءبىرىنشى كەزەڭىندە باق سىناعان وتانداستارىمىزدان بەرىك ءابدىراحمانوۆ (60 كەلى) ەشكىمگە دەس بەرمەي، APB جوباسى بويىنشا ەلىمىزدەن شىققان تۇڭعىش چەمپيون اتاندى.

بىردەن ايتا كەتەيىك، بۇل جوبانىڭ باستى ەرەكشەلىگى - ءار كەزەڭدە ۇزدىك شىققان بوكسشىلارعا 2016 -جىلعى برازيليادا وتەتىن ريو وليمپياداسىنا قاتىسۋعا جولدامالار تاپسىرىلادى. مىنە، بەرىك ءابدىراحمانوۆ بۇل مۇمكىندىكتى دە ءوزىنىڭ پايداسىنا شەشىپ، XXXI جازعى وليمپيادا ويىندارىنا جولداما العان تۇڭعىش قازاقستاندىق سپورتشى اتاعىنا دا قول جەتكىزدى. الايدا، بەرىك APB ەرەجەسىنە سايكەس ەكىنشى كەزەڭنىڭ جەڭىمپازىمەن جۇدىرىقتاساتىن بولادى.

ارينە، بۇل جەتىستىك بەرىكتىڭ عانا قۋانىشى ەمەس، ەلىمىزدىڭ دە مەرەيى. ولاي دەيتىنىمىز قازاق بوكسشىلارى الەمدىك ارەنادا ءوزىنىڭ مىقتىلىعىن تاعى ءبىر مارتە دالەلدەدى دەگەن ءسوز. سوندىقتان، APB (AIBA Pro Boxing) جوباسىنىڭ ءبىرىنشى كەزەڭى قازاقستان ءۇشىن ءساتتى اياقتالدى دەۋگە تولىق نەگىز بار.

ەندى ساناۋلى كۇندەردەن كەيىن، ناقتىراق ايتساق الداعى سەنبى-جەكسەنبى كۇندەرى اتالمىش جوبانىڭ ەكىنشى كەزەڭى جالاۋىن جەلبىرەتپەك. بۇل ماۋسىمدى دا جەرلەستەرىمىز اسىعا كۇتىپ جۇرگەنى انىق. سەبەبى، APB جوباسىنىڭ ەكىنشى كەزەڭىندە ءبىر ەمەس، ءۇش بىردەي بوكسشىمىز بىلعارى قولعابىن قولىنا قايتا كيىپ، جارىستى ودان ارمەن جالعاستىراتىن بولادى.

ولار - ءبىرجان جاقىپوۆ (49 كەلى)، ءىلياس سۇلەيمەنوۆ (52 كەلى) جانە انتون پينچۋك (91 كەلى).

الداعى كۇندەرى اتتارى اتالعان ءۇش بوكسشىمىزعا بەرىكتىڭ جولىن بەرسىن دەي وتىرىپ، ونەرلەرىن تاماشالايتىن بولامىز. ەندى ءارقايسىسىنا جەكە- جەكە توقتالايىق.

ءبىرجان جاقىپوۆ APB (AIBA Pro Boxing) جوباسىنىڭ ءبىرىنشى كەزەڭىنىڭ قورىتىندىسى بويىنشا ءوز سالماعىندا رەيتينگتە ەكىنشى ءنومىرلى بوكسشى بولىپ تىركەلىپ تۇر. ءبىرجان ءبىرىنشى كەزەڭدە ءتورت كەزدەسۋ وتكىزىپ، سونىڭ ۇشەۋىندە جەڭىسكە جەتىپ، بىرەۋىندە قارسىلاسىنا جول بەردى. ول ەكىنشى كەزەڭدە رەيتينگتەگى ءۇشىنشى ءنومىرلى بوكسشىمەن، ياعني فيليپپيندىك انتونيو بارريگامەن كەزدەسەدى.

ال بۇل سالماقتاعى ەكىنشى جۇپتاعى بوكسشىلار جۋن لين ۆۋ (قىتاي) جانە چاگاس ۆالەريو لوۋرەنسي (برازيليا) كەزدەسەدى. وسى ەكى جۇپتا جەڭىسكە جەتكەن بوكسشىلار 10-11 -شىلدە كۇندەرى ايقاسىپ، فينالدا باق سىناۋ قۇقىعىنا تالاسادى. شەشۋشى سىندا ونەر كورسەتۋ مۇمكىندىگىنە يە بولعان بوكسشى جاڭا جوبانىڭ ەرەجەسىنە سايكەس، 11-12 -قىركۇيەكتە ءبىرىنشى كەزەڭدە جەڭىمپاز اتانعان ليۋ بينمەن (قىتاي) جۇدىرىق تۇيىستىرەدى.

ەكىنشى بوكسشىمىز ءىلياس سۇلەيمەنوۆ ءبىرىنشى كەزەڭدەگى رەيتينگ قورىتىندىسى بويىنشا ۇزدىك ۇشتىكتى تۇيىندەپ تۇر. ەكىنشى كەزەڭدەگى قارسىلاسى وسى سالماقتاعى وزىنەن ءبىر ساتى جوعارى تۇرعان، ياعني ەكىنشى ءنومىرلى وزبەك بوكسشىسى جاسۋربەك لاتيپوۆپەن كەزدەسەدى.

ەكىنشى جۇپتا ەلياس ەميگديو (مەكسيكا) جانە فەرناندو مارتينەس (ارگەنتينا) ايقاسادى. بۇل ەكى جۇپتىڭ جەڭىمپازى دا 10-11 شىلدە كۇندەرى شايقاسىپ، جەڭگەنى فينالدا ميشا الوياننىڭ (رەسەي) چەمپيوندىق اتاعى مەن بەلبەۋىن تارتىپ الۋعا كۇش سالاتىن بولادى.

ال ءۇشىنشى بوكسشىمىز انتون پينچۋك تە ءوز سالماعىندا جاڭا جوبا رەيتينگىندە ءۇشىنشى ءنومىرلى بوكسشى بولىپ تىركەلىپ تۇر. ەندى ول وسى سالماقتاعى رەيتينگتە وزىنەن ءبىر ساتى ءباسى بيىك تۇرعان ەكىنشى ءنومىرلى الجير بوكسشىسى چۋايب بۋلۋديناتسپەن قولعاپ تۇيىستىرەدى. ال ەكىنشى جۇپتا كلەمەنتە رۋسسو (يتاليا) جانە رومان گولوۆاشەنكو (ۋكراينا) شارشى الاڭدا كىم مىقتىنى انىقتايدى. وسى ەكى جۇپتىڭ جەڭىمپازى شىلدەنىڭ ورتاسىنا تامان كەزدەسىپ، فينالدا رەسەيلىك الەكسەي ەگوروۆتىڭ ءبىرىنشى كەزەڭدەگى جەڭىپ العان اتاعى مەن بەلبەۋىن تارتىپ الۋعا كۇشتەرىن سالاتىن بولادى.

ەستەرىڭىزگە سالا كەتەيىك، AIBA- نىڭ APB جوباسى اياسىندا بيىل 2016 -جىلعى ريو وليمپياداسىنا 10 سالماق دارەجەسىندە ءار سالماققا 2 جولدامادان جالپى سانى 20 جولداما قاراستىرىلعان. قازىر ءبىرىنشى كەزەڭنىڭ قورىتىندىسى بويىنشا 10 جولداما ءوز يەلەرىن تاپتى.

وليمپيادا ويىندارىنىڭ جولداماسىنا يەلىك ەتكەن بوكسشىلار مىنالار:

49 كەلى: لۋ بين - قىتاي

52 كەلى: ميشا الويان - رەسەي

56 كەلى: حەدافي دجەلحيەر - فرانسيا

60 كەلى: بەرىك ءابدىراحمانوۆ - قازاقستان

64 كەلى: ارمەن زاكاريان - رەسەي

69 كەلى: ونۋر سيپال - تۇركيا

75 كەلى: ادەم كىليچي - تۇركيا

81 كەلى: ەحسان رۋزباحاني - يران

91 كەلى: الەكسەي ەگوروۆ - رەسەي

+91 كەلى: ەريك پفايفەر - گەرمانيا

ەندى قالعان 10 جولداماعا تالاساتىندار قاتارىندا ءۇش بوكسشىمىز بار ەكەنىن جوعارىدا اتاپ وتتىك. بۇل AIBA Pro Boxing (APB) جوباسىنىڭ تاعى ءبىر ەرەكشەلىگى - بۇل باسەكەلەر بيىلعى فينالدىق كەزەڭمەن توقتاپ قالمايدى. وسى جوبامەن 5 جىلعا دەيىن كەلىسىمشارتقا وتىرعان ءاربىر بوكسشىعا حالىقارالىق اۋەسقوي بوكس قاۋىمداستىعىنىڭ (AIBA) جىلىنا كەم دەگەندە 4-5 كەزدەسۋ وتكىزۋگە كەپىلدىك بەرىلگەن.

سوعان سايكەس ءار سالماقتا چەمپيون انىقتالعاننان كەيىن، بۇل جوبا كوكتەمگى، جازعى، كۇزگى مەزگىلدەرگە اۋىسىپ وتىرادى. ياعني جىلىنا 2-3 رەت ءار سالماقتاعى چەمپيونداردىڭ چەمپيوندىق اتاقتى قورعاۋ، وعان ۇمىتكەرلىككە قۇقىق بەرەتىن، رەيتينگتى كوتەرەتىن ىرىكتەۋ كەزەڭدەرىمەن الداعى ۋاقىتتا جالعاسىن تابا بەرەدى. سوندىقتان، قازاق ەلىنىڭ بوكسشىلارى الداعى ۋاقىتتا، ءالى تالاي مەرەيىمىزدى اسىرادى دەگەن ۇمىتتەمىز.

 كۇنسۇلتان وتارباي