جوعارعى وقۋ ورىندارىن وقىعان ادامدار مي جاراقاتىنان تەز جازىلادى

استانا. قازاقپارات - امەريكا قۇراما شتاتتارىنىڭ عالىمدارعا ارنالعان باسىلىمدارى جوعارعى وقۋ ورىندارىن ءتامامداعان ءبىلىمدى ادامدار باسقالارعا قاراعاندا مي جاراقاتىن جەڭىل وتكەرەتىنىن جازىپ وتىر.

 بۇعان ساراپتاما جاساپ، زەرتتەگەن عىلىمي باسىلىم - Neurology.

ج و و- دا وقىپ، بىتىرگەن مامانداردىڭ ميعا زاقىم كەلگەن اۋرۋلارعا ءتوزىمدى بولاتىنى جايلى تۇجىرىمعا جاقىندا عانا وسىنداي جاراقات العان 769 ادام قاتىسقان زەرتتەۋ جۇمىستارى كەزىندە كەلگەن.

ماماندار زەرتتەۋ جۇمىستارىنا قاتىساتىن 769 ادامدى ءبىلىم ساتىلارىنا قاراي ءۇش توپقا بولگەن. ءبىرىنشى توپقا مەكتەپ بىتىرگەن نەمەسە مەكتەپ بىتىرمەگەن ادامدار بولىنسە، ەكىنشى توپقا ورتا ءبىلىم العان ادامدار جانە قوسىمشا كۋرس وقىعان ازاماتتار كىرگەن. ال ءۇشىنشى توپقا ج و و- دا باكالاۆردى ءتامامداعان، ماگيستراتۋرا جانە دوكتورانتۋرا ساتىسى بويىنشا ءبىلىم العان ادامداردى توپتاستىرعان. باقىلاۋ ءبىر جىلعا سوزىلعان. ناتيجەسىندە جوعارعى ءبىلىمى بار ازاماتتار باسقالارمەن سالىستىرعاندا كەز كەلگەن جاراقاتقا قاراماي مي جاراقاتتارىن تەز وتكەرىپ، توزىمدىلىك تانىتا بىلگەن.

«جوعارعى وقۋ ورىندارىندا ءبىلىم الىپ، ءتامامداعان قاتىسۋشىلار ءبىلىم دەڭگەيى تومەن باسقا قاتىسۋشىلارعا قاراعاندا جەتى ەسە ەرتە جازىلعان. ال ەكىنشى توپتاعىلار بەس ەسە ەرتە ءال جيناپ، ورنىنا كەلدى»، - دەيدى وسى زەرتتەۋدىڭ اۆتورى، دوكتور ەريك شنايدەر.

 مەكتەپ بىتىرۋمەن عانا شەكتەلگەن جانە مەكتەپتەگى ءبىلىمدى دە تولىق اياقتاي الماعان قاتىسۋشىلار ۇزاق ۋاقىت بويى ورنىنا كەلە الماي، شارشاعان كورىنەدى. وسى ارقىلى زەرتتەۋگە ات سالىسۋشىلار ءبىلىمنىڭ ادام دەنساۋلىعىنا دا پايداسى بارىنا كوز جەتكىزگەن، دەپ جازادى massaget.kz.