كۇردەلى سىرتقى ەكونوميكالىق جاعدايلارعا قاراماستان قازاقستان ينۆەستورلار ءۇشىن تارتىمدىلىعىمەن تانىلىپ وتىر - ن. نازاربايەۆ - فوتو
دەپ حابارلادى اقوردانىڭ باسپا ءسوز قىزمەتى.
ءىس- شارا باستالماس بۇرىن مەملەكەت باسشىسى ەلدىڭ اگروونەركاسىپ كەشەنىنىڭ ينۆەستيتسيالىق جوبالارىمەن تانىستى.
ەلباسى قازاقستاننىڭ كۇردەلى سىرتقى ەكونوميكالىق جاعدايلار مەن گەوساياسي سىن- قاتەرلەرگە قاراماستان ورنىقتى ەكونوميكالىق وسىمگە قول جەتكىزىپ، شەتەلدىك ينۆەستورلار ءۇشىن تارتىمدىلىعىمەن تانىلىپ وتىرعانىن اتاپ ءوتتى.
- بيىل جالپى وتىرىستىڭ تاقىرىبى قازاقستانداعى اگروبيزنەستىڭ دامۋى تۋرالى بولدى. مۇنداي تاقىرىپ كەزدەيسوق تاڭدالعان جوق. قازاقستان - اۋماعى جونىنەن الەمدە توعىزىنشى ورىن الاتىن جانە اۋىل شارۋاشىلىعىنىڭ بىرەگەي رەسۋرستارىنا يە ەل. قازاقستان ءداستۇرلى وڭىرلىك نارىقتاردى، سونداي- اق قىتايداعى، ءۇندىستان مەن تاياۋ شىعىستاعى جاڭا نارىقتاردى قامتاماسىز ەتۋ ءۇشىن گەوگرافيالىق تۇرعىدان قولايلى ورنالاسقان. اۋىل شارۋاشىلىعى رەسۋرستارىنىڭ اۋقىمىن ەسكەرسەك، ەلدىڭ وتاندىق جانە شەتەلدىك ينۆەستورلار ءۇشىن تارتىمدى، ءبىراق ءالى اشىلا قويماعان الەۋەتى بار، - دەدى نۇرسۇلتان نازاربايەۆ.
قازاقستان پرەزيدەنتى ەلدەگى مۇمكىندىكتەردى پايدالانۋ ءۇشىن ءبىرقاتار شارالاردىڭ بىرنەشە باعىتتا جۇزەگە اسىرىلىپ جاتقانىن ايتتى. سولاردىڭ قاتارىندا قولايلى ينۆەستيتسيالىق احۋال قالىپتاستىرۋ، ترانسۇلتتىق كومپانيالاردى تارتۋ ارقىلى وڭدەۋ ءىسىن دامىتۋ، عىلىمدى، يننوۆاتسيانى جانە كادر دايارلاۋدى ىنتالاندىرۋ، ينستيتۋتسيونالدىق رەفورمالار جۇرگىزۋ شارالارى بار.
نۇرسۇلتان نازاربايەۆ ينۆەستورلاردى قازاقستانداعى اگروءوندىرىستى دامىتۋ ءۇشىن ينۆەستيتسيا سالۋعا شاقىردى.
- بۇل ءبىزدىڭ بارىمىزگە پايدالى بولاتىنىنا سەنىمدىمىن. ينۆەستيتسيالىق ۇدەرىستە قاجەتتى قارجىلىق ينفراقۇرىلىمنىڭ بولۋى ماڭىزدى ءرول اتقارادى. وسى ماقساتپەن «ەكسپو-2017» بازاسىندا حالىقارالىق قارجى ورتالىعىن اشۋ قاراستىرىلۋدا. سوندىقتان كەڭەستىڭ كەلەسى 29- وتىرىسىن «استانا - حالىقارالىق قارجى ورتالىعى» تاقىرىبىنا ارناپ، ونى ەلوردادا وتكىزۋدى ۇسىنامىن، - دەدى قازاقستان پرەزيدەنتى.
سوڭىندا مەملەكەت باسشىسى قاتىسۋشىلارعا قىزىقتى باياندامالارى مەن ۇسىنىستارى، تۇسىندىرمەلەرى ءۇشىن ريزاشىلىعىن ءبىلدىرىپ، كەڭەس جۇمىسىنا كوپ جىلدان بەرى قولداۋ كورسەتىلىپ كەلە جاتقانىنا، قازاقستانداعى ينۆەستيتسيالىق احۋالدى جەتىلدىرۋگە قوسىلعان ۇلەسكە جوعارى باعا بەردى.
وتىرىس بارىسىندا ەۋروپالىق قايتا قۇرۋ جانە دامۋ بانكىنىڭ پرەزيدەنتى س. چاكرابارتي، ينۆەستيتسيالار جانە دامۋ ءمينيسترى ءا. يسەكەشيەۆ، «شەتەلدىك ينۆەستورلاردىڭ قازاقستاندىق كەڭەسى» قاۋىمداستىعى باسقارماسىنىڭ ءتوراعاسى ۋ. ۆوكۋركا، اۋىل شارۋاشىلىعى ءمينيسترى ا. مامىتبەكوۆ ءسوز سويلەدى.
سونىمەن قاتار، «بەيكەر جانە ماككەنزي ينتەرنەشنل» كومپانياسىنىڭ باس ديرەكتورىنىڭ ورىنباسارى ە. شير، «فيليپ موريس ينتەرنەشنل» كومپانياسىنىڭ اعا ۆيسە- پرەزيدەنتى ن. دەنيس، «سيتيگرۋپ» باس اتقارۋشى ديرەكتورى دج. كوۋلز، «ەرنست ەند يانگ» جاھاندىق باسقارۋشى سەرىكتەسى ك. دي سيبيو، «دويچە بانك اگ» باسقارۋشى ديرەكتورى پ. تيلس، «دەلويت سنگ» باسقارۋشى سەرىكتەسى ي. كوۋلبەرن، «رۋسسكيە ماشينى» ديرەكتورلار كەڭەسىنىڭ ءتوراعاسى ز. ۆولف كۇن تارتىبىندەگى نەگىزگى ماسەلە بويىنشا ءوز پىكىرلەرىن ورتاعا سالدى.
