ءار ازامات مەملەكەتتىك رامىزدەردى بويتۇمارداي قاستەر تۇتۋى قاجەت - ا. ەسەكەنوۆا

ورال. قازاقپارات - ءار ازامات قازاقستاننىڭ تۋىن، ەلتاڭباسىن، ءانۇرانىن بويتۇمارداي قاستەر تۇتۋى قاجەت.

ەلباسى جارلىعىمەن 4 -ماۋسىم مەملەكەتتىك رامىزدەر كۇنى رەتىندە بەلگىلەنىپ، مەملەكەتتىك ماڭىزى بار ايتۋلى كۇندەر قاتارىنا قوسىلدى.

بۇل كۇنى بارشا حالىق مەرەكەگە ءتان كوتەرىڭكى كوڭىل-كۇيمەن شارالارعا قاتىسىپ، مەملەكەتتىك رامىزدەرگە دەگەن قۇرمەتتى سەزىنە تۇسەدى.

ەلباسى ن. نازاربايەۆ: «مەملەكەتتىك رامىزدەر - بۇل ءبىزدىڭ مەملەكەتىمىزدىڭ، ءبىزدىڭ ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشىسى وبرازىن بىلدىرەدى»، دەپ ەرەكشە اتاپ ءوتتى.

ولاي بولسا، مەملەكەتتىك رامىزدەر - ءبىزدىڭ مەملەكەتىمىزدىڭ بەت- بەينەسى عانا ەمەس، ونىڭ تاريحى جانە ءاربىر ادامنىڭ ءوز ەلىنە دەگەن سۇيىسپەنشىلىگىنىڭ بەلگىسى. بقو ىشكى ساياسات باسقارماسىنىڭ باسشىسى ايگۇل ەسەكەنوۆا ءوز وي-تولعامىن وسىلايشا ءبىلدىردى.

ونىڭ ايتۋىنشا، مەملەكەتتىك رامىزدەردىڭ ۇلتتىق جانە جالپىقازاقستاندىق پاتريوتيزمدى قالىپتاستىرۋداعى ورنى ەرەكشە ەكەنى داۋسىز.

وبلىستا مەملەكەتتىك رامىزدەردى قولدانۋ جانە ناسيحاتتاۋ كەشەندىك جوسپارعا جانە ارنايى جاساقتالعان مەديا- جوسپارعا ساي جۇرگىزىلۋدە. باتىس قازاقستان وبلىسىنىڭ ىشكى ساياسات باسقارماسى وبلىس اكىمى جانىنداعى قازاقستان رەسپۋبليكاسىنىڭ مەملەكەتتىك رامىزدەرى جونىندەگى كوميسسيانىڭ جۇمىس ورگانى بولىپ تابىلادى.

كوميسسيا وتىرىسى جوسپارعا ساي جىلىنا ءتورت رەت، ياعني توقسانىنا ءبىر رەت وتكىزىلەدى. وندا بارلىق اۋدانداردا، وبلىس ورتالىعىنداعى مەملەكەتتىك ورگانداردا رامىزدەردى پايدالانۋ بارىسى ءتيىستى قۇزىرلى ورگاندارمەن بىرلەسكەن تۇردە تەكسەرىلىپ، قورىتىندىسى وبلىستىق كوميسسياعا شىعارىلادى. ورىن العان كەمشىلىكتەردى جويۋ تۋرالى شەشىمدەر قابىلدانادى.

سونىمەن قاتار مەملەكەتتىك رامىزدەر جونىندەگى رەسپۋبليكالىق كوميسسيانىڭ شەشىمىمەن مەملەكەتتىك رامىزدەردى پايدالانۋ، ناسيحاتتاۋ جانە قولدانۋ جونىندەگى جۇمىستاردىڭ جاي-كۇيى بويىنشا ينسپەكتسيالىق تەكسەرۋلەر وتكىزىلىپ تۇرادى.

بەكىتىلگەن جوسپارعا ساي قازاقستان رەسپۋبليكاسىنىڭ مەملەكەتتىك رامىزدەرى كۇنىنە وراي جىل سايىن 4 -ماۋسىمدا ورال قالاسىنداعى اباي الاڭىندا، سونداي-اق وبلىستىڭ بارلىق اۋداندارىندا «مەنىڭ قازاقستانىم» اتتى جاستار پاتريوتتىق فورۋمى ۇيىمداستىرىلىپ كەلەدى.

بيىل دا وبلىس باسشىسىنىڭ قاتىسۋىمەن «مەنىڭ ەلىم - قازاقستان!» اتتى جاستاردىڭ پاتريوتتىق اكسياسى وتپەكشى. ورال قالاسى مەن بارلىق اۋدانداردا رامىزدەردى ناسيحاتتاۋ، ولاردى دۇرىس قولدانۋ ماسەلەلەرى بويىنشا دوڭگەلەك ۇستەلدەر، عىلىمي-پراكتيكالىق كونفەرەنسيالار، پاتريوتتىق اكسيالار وزدىرىلادى. كىتاپحانالاردا مەملەكەتتىك رامىزدەرگە ارنالعان ءتۇرلى بايقاۋ- كورمەلەر بولىپ تۇرادى.

بالاباقشالار مەن اۋلا كلۋبتارى اراسىندا «رامىزدەر تاريحى»، «قازاقستان - تۋىمەن تۇعىرلى، انۇرانىمەن ايباتتى، ەلتاڭباسىمەن ەڭسەلى»، «قازاقستان رەسپۋبليكاسىنىڭ مەملەكەتتىك رامىزدەرىنە قۇرمەت» اتتى شارالار ۇيىمداستىرىلدى.

«جىل سايىن وبلىستىق ىشكى ساياسات باسقارماسى تاراپىنان قازاقستان رەسپۋبليكاسىنىڭ مەملەكەتتىك رامىزدەرىن قولدانۋ بويىنشا ادىستەمەلىك قۇرالدار شىعارىلۋدا. ولار وبلىس بويىنشا جانە ءتيىستى مەملەكەتتىك ورگاندارعا تاراتىلادى.

ەلدىك ەركىندىگىمىزدىڭ قاسيەتتى بەلگىلەرىن قادىرلەۋ تەك مەملەكەتتىك ورگاندار مەن لاۋازىمدى تۇلعالارعا عانا مىندەتتى ەمەس، ول - ءار ادامنىڭ پارىزى. قازاقستان رەسپۋبليكاسىنىڭ مەملەكەتتىك رامىزدەرىن قۇرمەتتەۋ - كونستيتۋتسيالىق زاڭنىڭ شەڭبەرىندە قۇقىقتىق راسىمدەلگەن. سوندىقتان قازاق ەلىن ماقتانىش تۇتا وتىرىپ، ءار ازاماتتىڭ مەملەكەتتىك رامىزدەردى قۇرمەتتەپ، ولاردى كەڭىنەن ناسيحاتتاۋعا بەلسەنە اتسالىسقانى ابزال»، - دەپ تۇيىندەدى ويىن ا. ەسەكەنوۆا.

اۆتور: ەلجان ەرالى