بۇگىن - قازاقستاننىڭ مەملەكەتتىك رامىزدەرى كۇنى

 استانا. قازاقپارات - بۇگىن - مەملەكەتتىك مەرەكە - قازاقستاننىڭ مەملەكەتتىك رامىزدەرى كۇنى.

بۇل كۇنى قازاقستاننىڭ بارلىق وڭىرلەرىندە، باستى استانا جانە الماتى قالالارىندا مەملەكەتتىك رامىزدەر كۇنىنە ارنالعان سالتاناتتى شارالار، دوڭگەلەك ۇستەلدەر، كونفەرەنسيالار جانە باسقا دا مەرەكەنى ۇلىقتايتىن شارالار وتەدى، ويتكەنى بۇل مەرەكە تاۋەلسىز قازاقستان تاريحىنداعى ەڭ ماڭىزدى وقيعالاردىڭ ءبىرى.

«قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 -جىلى 4 -ماۋسىمدا قابىلداندى. وسى زاڭعا سايكەس جىل سايىن 4 -ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.

 مەملەكەتتىك رامىزدەر - بۇل كەز كەلگەن مەملەكەتتىڭ ەگەمەندىگى مەن ءبىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى. قازاقستان رەسپۋبليكاسىندا مەملەكەتتىك تۋ، مەملەكەتتىك ەلتاڭبا جانە مەملەكەتتىك ءانۇران مەملەكەتتىك رامىزدەر بولىپ تابىلادى. «مەملەكەتتىك رامىزدەر -  بۇل ءبىزدىڭ مەملەكەتىمىزدىڭ، ءبىزدىڭ ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشى وبرازىن بىلدىرەدى»، - دەگەن بولاتىن ەلباسى نۇرسۇلتان نازاربايەۆ.

قازاقستان رەسپۋبليكاسىنىڭ مەملەكەتتىك تۋى

قازاقستان رەسپۋبليكاسىنىڭ مەملەكەتتىك تۋى - ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس.

قازاقستان رەسپۋبليكاسى مەملەكەتتىك تۋىنىڭ اۆتورى - قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ.

قازاقستان رەسپۋبليكاسىنىڭ مەملەكەتتىك ەلتاڭباسى

قازاقستان رەسپۋبليكاسىنىڭ مەملەكەتتىك ەلتاڭباسى - دوڭگەلەك نىساندى جانە كوگىلدىر ءتۇس اياسىنداعى شاڭىراق تۇرىندە بەينەلەنگەن، شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاستىرىلعان. جوعارعى بولىگىندە - بەس بۇرىشتى كولەمدى جۇلدىز، ال تومەنگى بولىگىندە «قازاقستان» دەگەن جازۋ بار. جۇلدىزدىڭ، شاڭىراقتىڭ، ۋىقتاردىڭ، اڭىزدارداعى قاناتتى پىراقتاردىڭ بەينەسى، سونداي-اق  «قازاقستان» دەگەن جازۋ - التىن تۇستەس.

قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى - بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ.

قازاقستان رەسپۋبليكاسىنىڭ مەملەكەتتىك ءانۇرانى

بۇرىن «مەنىڭ قازاقستانىم» ءانى رەتىندە تانىمال بولعان قازاقستاننىڭ ءانۇرانى پرەزيدەنت نۇرسۇلتان نازاربايەۆتىڭ باستاماسى بويىنشا 2006 -جىلى 6 -قاڭتاردا ەلىمىزدىڭ پارلامەنتىندە بەكىتىلدى. ءبىرىنشى رەت ول 2006 -جىلى 11 -قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى.

مۋزىكاسى - كومپوزيتور ءشامشى قالداياقوۆتىكى، ءسوزى - جۇمەكەن ناجىمەدەنوۆ پەن نۇرسۇلتان نازاربايەۆتىكى.