قاراعاندى وبلىسىندا تاسقىننان زارداپ شەككەندەرگە ارنالعان العاشقى ۇيلەر پايدالانۋعا بەرىلدى

ايتا كەتسەك، اتالعان ەلدى مەكەندە ءبىر اي بۇرىن سۋ تاسقىنىنان زارداپ شەككەن، اپاتتى دەپ تانىلعان جانە سۇرىلگەن ۇيلەردىڭ ورنىنا جاڭا باسپانا قۇرىلىسى باستالعان بولاتىن، دەپ حابارلايدى BNews. kz ءتىلشىسى.
وبلىس اكىمىنىڭ ءبىرىنشى ورىنباسارى اسىلبەك دۇيسەبايەۆ ايماق باسشىسىنا تۇرعىن ۇيلەردى قالپىنا كەلتىرۋ بويىنشا اتقارىلىپ جاتقان جۇمىس تۋرالى باياندادى. قۇرىلىس جۇمىستارى بەكىتىلگەن كەستەگە سايكەس ىسكە اسقان بولاتىن، ال بوي كوتەرىپ جاتقان ۇيلەردىڭ ساپاسى ۇنەمى باقىلاۋدا بولدى.
بەسىنشى مامىر كۇنى اتالعان اۋىلدا سۋ تاسقىنىنان ىرگەسى سوگىلىپ، قيراعان ۇيلەردىڭ ورنىنا جاڭا ۇيلەر سالىنا باستاعان ەدى. ەندى، مىنە ءبىر ايعا جەتەر- جەتپەس ۋاقىت ىشىندە فۋتبولنىي كوشەسىندەگى العاشقى ۇيلەردىڭ قۇرىلىسى اياقتالدى.
«قۋانىشىمدا شەك جوق! ۋادە ەتكەندەي ءۇيدى ۋاقىتىندا تاپسىردى. ۇيگە كوڭىلىم تولادى، قابىرعالارى جوعارى، پلاستيكالىق تەرەزەلەر، جارىق تا تارتىلعان، ەسكى ۇيىمىزدەگى سەكىلدى توبەدە بورەنەلەر جوق. ءبارى تاماشا، قاتتى ۇنادى. اندا- مىندا سەندەلىپ جۇرگەننەن ءبىز دە شارشادىق، ەندى ءوز شاڭىراعىمىز بار»، - دەيدى قۋانىشىمىن بولىسكەن ءۇي يەسى يۋليا مالىشەۆا.
بوي كوتەرىپ جاتقان باسپانالاردىڭ ساپاسى ءۇي يەلەرىنىڭ ۇنەمى باقىلاۋىندا بولعان ەكەن.
قاراعاندى وبلىسى اكىمدىگىنەن مالىمدەگەندەي، قالعان ۇيلەردىڭ قۇرىلىسى كەزەڭ-كەزەڭمەن جۇزەگە اسىرىلادى.
«قۇرىلىسشىلار وسى كوشەدەگى قالعان ۇيلەردىڭ قۇرىلىسىن باستاپ تا كەتتى، سۇرىلگەن باسپانالاردىڭ ورنىنا سالىنىپ جاتقان ۇيلەردىڭ ىرگەتاسى قالانىپ قويعان»، - دەپ اتاپ ءوتتى ع. مۇستافين اتىنداعى اۋىلدىڭ تۇرعىندارى.