تۇركيا تاريحىندا تۇڭعىش رەت قازاق پارلامەنت دەپۋتاتى بولۋى مۇمكىن
تۇركيانىڭ ۇلى ۇلتتىق ءماجىلىسىنىڭ دەپۋتاتى بولۋعا قازاق دياسپوراسىنىڭ وكىلى، سول ەلدەگى قانداسىمىز رەشيدە يۋكسەل دە ۇمىتكەر.
بۇل ساياسي دوداعا ول بيلىك باسىنداعى ادىلەت جانە دامۋ پارتياسىنىڭ اتىنان ءتۇسىپ وتىر. ەگەر كوپشىلىكتىڭ قولداۋىمەن وسى سايلاۋدا جەڭىپ شىقسا، وندا ول تۇرىك پارلامەتىنە سايلانعان قازاقتان شىققان تۇڭعىش دەپۋتات بولماق. رەشيدە يۋكسەل پارلامەنت سايلاۋىنا ىستامبۇلدىڭ ەكىنشى ايماعىنان قاتىسۋدا. وعان قالانىڭ 12 اۋدانى كىرەدى.
ساراپشىلار ساياسي پارتيالار اراسىندا نەگىزگى باسەكە، اسىرەسە وسى اۋدانداردا تارتىستى وتەتىندىگىن ايتادى. سوندىقتان ۇمىتكەرلەر ۇگىت- ناسيحات كەزىندە سايلاۋشىلارىنىڭ قاس- قاباعىن باعىپ، كوڭىلدەرىنەن شىعۋدىڭ بارلىق امالدارىن جاساۋدا. مىسالى كانديداتتار ەل- جۇرتقا سايلاۋالدى تۇعىرنامالارى جازىلعان پاراقشالارىمەن بىرگە گۇل دە تاراتۋدا.
رەشيدە يۋكسەل، تۇركيا ۇلى ۇلتتىق ماجىلىسىنە ۇمىتكەر:
- مەن دەپۋتات بولىپ شىقسام، مەن ءۇشىن ۇلكەن مارتەبە. بۇل ءبىزدىڭ وسىنداعى قازاقتار ءۇشىن دە ۇلكەن مارتەبە بولادى. مەن ءوزىم دارىگەر بولعان سوڭ ەڭ اۋەلى دارىگەرلەردىڭ قۇقىقتارىن قورعايمىن. ودان كەيىن قازاق ءتىلىن ۇمىتىپ بارامىز، ۇلكەندەر ورتامىزدا جوق. سوندىقتان قازاق ءتىلىنىڭ مەكتەبىن اشپاسام دا، كۋرس اشسام دەيمىن.
بۇل كۇندەرى تۇركيادا كوشە بويى ساياسي پارتيالاردىڭ ءتۇرلى- ءتۇستى تۋلارى، ۇراندارى مەن جارنامالارى ءىلۋلى. ال پارتيا جەتەكشىلەرى مەن تانىمال ساياساتكەرلەر حالىقتى الاڭعا جيىپ، ولاردى داۋىس بەرۋگە بارىنشا ۇگىتتەپ جاتىر. بيلىكتىڭ ادىلەت جانە دامۋ پارتياسى سايلاۋدا جەڭىسكە جەتسەك، كونستيتۋتسياعا وزگەرىس ەنگىزىپ پرەزيدەنتتىك باسقارۋ جۇيەسىنە كوشەمىز دەيدى. ال وپپوزيتسيالىق رەسپۋبليكالىق حالىق پارتياسى بولسا، ەلدىڭ ءال- اۋقاتىن ارتىراتىن عاسىر جوبالارىن جۇزەگە اسىرامىز دەپ ۋادەلەرىن ءۇيىپ توگۋدە.
تۇران چوبان، ادانا قالاسىنىڭ تۇرعىنى:
- بيىلعى پارلامەنتتىك سايلاۋ ەلىمىز ءۇشىن وتە ماڭىزدى. ويتكەنى مەملەكەتىمىزدىڭ الداعى دامۋ جولى ۇكىمەتىمىزدى جاساقتايتىن وسى حالىق قالاۋلارىنا بايلانىستى بولماق. مەن ءوز تاڭداۋىمدى جاسادىم. الدا 7- ماۋسىمدا سايلاۋعا قاتىسىپ، ازاماتتىق قۇقىعىمدى پايدالانامىن. ەل ەرتەڭى ءۇشىن ەنجارلىق تانىتۋعا بولمايدى.
بيىل تۇركيادا پارلامەنت سايلاۋىنا ەل ىشىندە 53 ميلليون 765 مىڭ، ال شەتەلدە 2 ميلليون 870 مىڭعا جۋىق تۇرىك ازاماتى داۋىس بەرۋ قۇقىعىنا يە. قازىر شەتەلدە جۇرگەن تۇرىك ازاماتتارى ءۇشىن ءبىرقاتار جەرلەردە سايلاۋ ۋچاسكەلەرى دە اشىلعان. 8- مامىر كۇنى ىستامبۇلداعى اتاتۇرىك اۋەجايىنا 12 سايلاۋ جاشىگى ورناتىلدى. وسى كۇنگە دەيىن وعان 21 مىڭ ادام داۋىس بەرىپ ۇلگەرىپتى.
